स्याङ्जा १३ साउन । स्याङ्जामा यसबर्ष रोपेको धानबाट १ अर्ब ७० करोड मूल्य बराबरको धान उत्पादन गर्ने लक्ष्य लिइएको छ । अहिलेसम्म स्याङजामा ९० प्रतिशत रोपाई सकिएको कृषि ज्ञान केन्द्रले जनाएको छ ।
स्याङ्जाका १४ हजार हेक्टर क्षेत्रफलमा धान रोपी ५६ हजार मेट्रिक टन उत्पादनको लक्ष्य लिएको कार्यालय प्रमुख बिनोद हमालले जानकारी दिनुभयो । उहाले भन्नुभयोे, ‘प्रति किलो न्यूनतम मूल्य ३० रुपैंया सरकारी मूल्य तोकिएकोे र प्रति हेक्टर ४ मेट्रिक टन धान फलाउने कार्यालयको अनुमान छ ।’
गतबर्ष ५४ हजार मेट्रिक टन धान उत्पादन भएको थियो । गतबर्ष भन्दा यसबर्ष २ हजार मेट्रिक टन उत्पादन बढ्न सक्ने कार्यालयले जनाएको छ ।
स्याङ्जामा सबैभन्दा धेरै रामधान, साबित्री, सुनौलो सुगन्धा, सावा मन्सुली र स्थानीय जातका धान रोप्ने गरिन्छ । साउनको दोश्रो साता सकिन लाग्दा धान रोपाई गरिने जग्गा मध्ये स्याङ्जामा ९० प्रतिशत रोपाईं सकिएको छ । अघिल्लो बर्ष यतीवेला ९२ प्रतिशत रोपाई सकिने गर्दथ्यो ।
धान खेतको कुल १४ हजार हेक्टर क्षेत्रफल मध्ये शुक्रवारसम्म १२ हजार ६ सय हेक्टरमा धान रोपाई सकिएको हो । प्रमुख हमालका अनुसार, ‘यहाँका ११ पालिकामा भएका रोपाईंका आधारमा औषतमा ८५ प्रतिशत रोपाई सकिएको हो।’
सबैभन्दा धेरै हरिनास, फेदिखोला र आँधीखोला गाउँपालिकामा भएका छन्। यी तीनवटै पालिकामा ९५ प्रतिशत रोपाईं सकिएका हुन्।सबैभन्दा कम चापाकोट नगरपालिकामा ७० प्रतिशत भएको छ।
पुतलीबजार, भीरकोट र वालिङ् नगरपालिका सहित विरुवा गाउँपालिकामा ९० प्रतिशत रोपाई सकिएका छन्। गल्याङ् नगरपालिका र कालीगण्डकी गाउँपालिकामा भने ८० प्रतिशत रोपाई सकिएको पालिकामा कार्यरत कृषि प्राबिधिकहरुले जनाएका छन ।
बाढी पहिराका कारण स्याङ्जामा सयौं हेक्टर जमिन प्रभावित बनेको छ । कयौं खेत बगरमा परिणत भएका छन भने कयौं खेतमाथि पहिरोले पुरिएका छन ।
नहर÷कुलोमा पानी चल्न नपाउँदा चापाकोट र गल्याङ नगरपालिकामा रोपाईका लागि कठिनाइ भएको छ । भारी बर्षातले कुलाका मुहान भत्काएकाले गतबर्ष भन्दा १० प्रतिशत कम रोपाई भएकोे प्रमुख हमालले जानकारी दिनुभयो । यी नगरपालिकामा धान खेतीका लागि उर्वर फाँट हुन। जिल्लाका सबै पालिकामा धान खेती अत्यन्त राम्रो हुने गर्दछ ।