स्याङ्जा २६ कात्तिक । शुक्रबार बिहान तीनजनालाई आक्रमण गरी घरभित्र पसेको चितुवा मरेको छ।
वालिङ नगरपालिका–१४ कफ्लेटीस्थित चण्डीप्रसाद पराजुलीको घरभित्र पसेको चितुवा मरेको अवस्थामा भेटिएको इलाका वन कार्यालय वालिङका प्रमुख सरोज जमरकट्टेलले जानकारी दिनुभयो ।
शुक्रबार बिहान खेतमा काम गरिरहेका एक पुरुषलाई आक्रमण गरेर आएको चितुवा पराजुलीको घरमा पसेको थियो । घरभित्र पसेको चितुवाले दुई महिलालाई आक्रमण गरी घाइते बनाएको थियो ।
मान्छेलाई आक्रमण गरी घाइते बनाएसँगै स्थानीयवासीले चितुवालाई घरमै थुनेका थिए। थुनेको चितुवा दिउसो खोजी गर्न लाग्दा मृत अवस्थामा भेटिएको बताइएको छ।
चितुवा बिरामी वा विष खाएर मानिसलाई आक्रमण गरेको हुनसक्ने आशङ्का गरिएको छ। चितुवालाई शनिबार शल्यक्रिया गरिने भएको छ।
चितुवाको आक्रमणबाट स्थानीय एक पुरुष र दुई महिला गरी तीनजना घाइते भएका थिए। घाइतेहरूको अनुहार, छाती र पाखुरामा चोट छ।
उनीहरुको पोखरास्थित गण्डकी मेडिकल कलेजमा उपचार भइरहेको छ भने खतरामुक्त रहेको परिवारले जनाएका छन्।