स्याङ्जा १ पुस । स्याङ्जाका २ वटा सरकारी बिद्यालयका कम्प्यूटर लगायत प्राबिधिक सामाग्री चोरी गरेको आरोपमा प्रहरीले पक्राउ गरेका ७ जनालाई बिहीवार सार्वजनिक गरेको छ।
प्रहरीका अनुसार फेदिखोला गाउँपालिका ४ स्थित आरुखर्क आधारभूत बिद्यालय र राम्चेदेवी आधारभूत बिद्यालयका कम्प्यूटर, प्रोजेक्टर, फोटोकपी मेशिन, प्रिन्टर एक÷एक वटा, मल्टीप्लग ३ वटा, बिद्यालय सुधार योजना पुस्तक चोरी भएको थियो।
पक्राउ पर्नेमा ३ जना स्याङ्जाका, २ जना पोखराका र २ जना लमजुङ घर भइ पोखरामा बस्दै आएको बताइएको छ। सामाग्री चोरी गर्ने, ओसार पसार र बिक्री वितरणमा समेत उनीहरु नै संलग्न देखिएको प्रहरी उपरीक्षक राजिव बस्नेतले जानकारी दिनुभयो ।
यसरी पक्राउ पर्नेमा फेदिखोला गाउँपालिकाका २६ बर्षका प्रेम विक, २१ का सुमन सुनार, पुतलीबजारका १९ का समिर सुनार, पोखरा महानगरपालिका का ३७ का दीपेन्द्र पोखरेल र २१ का प्रविण नेपाली, लमजुङका २९ का राजु मजाकोटी र २७ का अमृत दुरालाई चोरीको आरोपमा पक्राउगरी कानूनी कारवाही अघि बढाइएको उपरीक्षक रविन्द्र खनालले जनाउनुभयो।
गएको फागुन २२ गते र २४ गते ३ दिनका बिचमा रातीको समयमा उनीहरुले बिद्यालयको कक्ष फोरेर सामानहरु चोरी फरार थिए। चोरेको ९ महिनापछि प्रहरीले उनीहरुको समूहलाई पक्राउ गरेको छ।
स्याङ्जाका प्रेम, सुमन र समिरले ती सामाग्री चोरी गरेको, लम्जुङका राजुले सप्लाई गरेको र लम्जु««ङका अमृत, पोखराका दिपेन्द्र र प्रविनले चोरीएका ति सामाग्री खरिद बिक्रीमा संलग्न रहेको प्रहरीको भनाई छ।
चोरी भएका सामान मध्ये प्रोजेक्टर र एउटा प्रिन्टर भेटिएको र अन्य सामाग्री खोजतलास सहित अनुसन्धान जारी रहेको बताइएको छ। आरोपी ७ जनालाई जिल्ला अदालत स्याङ्जाबाट म्याद लिए थप अनुसन्धान शुरु गरिएको प्रहरीले जनाएको छ।
