काठमाडौं, ३ असार । देशभर बाढी पहिरोबाट पछिल्लो दुई दिनमा कम्तिमा ५ जनाको मृत्यु भएको छ ।
राष्ट्रिय विपद् न्यूनीकरण तथा व्यवस्थापन प्राधिकरण र प्रहरी प्रधान कार्यालयको तथ्यांक अनुसार ५ जनाले ज्यान गुमाउँदा ३४ जना बेपत्ता भएका छन् ।
सिन्धुपाल्चोकमा २० जना र जाजरकोटमा सात जना बेपत्ता भएको खबर छ । बाढीले बगाएर सिन्धुपाल्चोकमा दुई जनाको मृत्यु भएको छ भने पाल्पा, कास्की र डोटीमा एक–एक जनाको मृत्यु भएको छ ।
हिजो साँझसम्म देशभर २२ ठाउँमा बाढी र पहिरोले क्ष्ति गरेको छ । बाढी र पहिरोबाट २६ जना घाइते भएका विपद् न्यूनिकरण तथा व्यवस्थापन प्राधिकरणले जनाएको छ ।
प्राकृतिक प्रकोपका कारण देशभर १ सय ६२ घर, परिवार विस्थापित भएका छन् । ५२ घरहरु भत्किएका छन् भने ४ वटा सरकारी कार्यालय र ५ वटा पुल भत्किएका छन् ।