स्याङ्जा ११ चैत । फेदिखोला गाउँपालिका १ सर्केटारीका जारी २ दिने प्रथम फेदिखोला आलु प्रर्दशनी सकिएको छ । आलु पकेट विस्तारसंगै प्रवद्र्धनमा जोड दिने उदेश्यले आलु प्रदर्शनी गरिएको हो । आलुका बिभिन्न परिवार बनाउनुका साथै आलु खरिद बिक्री गरिएका छन् ।
कृषि उपज बजार ब्यवस्थापन सहकारी संस्था लिमिटेड र फेदिखोला साना किसान कृषि सहकारी संस्था लिमिटेड सेवा केन्द्रको ब्यवस्थापनमा प्रदर्शनी गरिएको हो ।
प्रदर्शनीको उदघाटन गर्दे गाउपालिकाका अध्यक्ष घनश्याम सुवेदीले गाउपालिकाले किसानलाई कृषि क्षेत्रबाट आत्मनिर्भर बनाउनेगरी काम गरिरहेको बताउनुभयो । उहाले किसानका उपजलाई पालिकाले थप अनुदान दिएर हौसला बढाउनेगरी पालिकाले काम गरेको जानकारी गराउनुभयो । किसानका लागि आवश्यक बीउ, विजन, उत्पादन र बिक्रीमा समेत सहयोग गर्दे आएको उहाको भनाई छ ।
कार्यक्रममा प्रधानमन्त्री कृषि आधुनिकीकरण सुन्तला सुपरजोनका प्रमुख माधव लम्साल, ज्ञान केन्द्रका योजना अधिकृत गुरुप्रसाद अर्याल लगायतले आलु किसानका लागि आवश्यक सहयोग गर्दै आएको र आगामी दिनमा समेत सहयोग गर्ने प्रतिवद्धता जनाउनुभयो ।
फेदिखोला गाउपालिका १ का वडा अध्यक्ष अमृत क्षेत्रीले किसानका उत्पादनलाई प्रवर्दन र बजारीकरणमा सहयोग पुरयाउने लक्ष्य सहित प्रदर्शनी गरिएको जानकारी दिनुभयो ।
प्रदर्शनीमा जनकदेव, खुमल उज्जवल लगायतका आलु किनबेच भएका थिए भने आलुबाट बनाइने बिभिन्न परिकार पनि बनाएर बिक्री एवं प्रदर्शनी गरिएका थिए । आमा समूहले आलुबाट बनेका बिभिन्न परिकार बनाएर चखाउनुका साथै बनाउने सीप समेत सिकाएका थिए ।
प्रर्दशनीमा झण्डै ६ हजार किलो आलुको किनबेच भएकोे छ । पालिकाभित्र धेरै परिणामा आलु उत्पादन गर्ने मध्येका प्रथम, दोश्रो, तृतीय र सान्त्वना हुने आलु उत्पादक किसालाई नगद सहित पुरस्कृत गरिएको छ । प्रर्दशनी राखिएका आलुको प्रति किलो ३५ रुपैंयामा खरिदबिक्री भएको थियो भने गाउँपालिकाले प्रति किलो ५ रुपैंया थप अनुदान उपलब्ध गराएको थियो ।
वडा अध्यक्ष अमृत क्षेत्रीको अध्यक्षतामा सम्पन्न कार्यक्रमको संचालन वडा सचिव छवीलाल ओलीले गर्नुभएको थियो । फेदिखोला आलु उत्पादनका लागि उर्वर भूमि मानिन्छ ।