स्याङ्जा १७ कात्तिक । बदर मत हुन नदिने उदेश्यले पुतलीबजारमा नमूना मतदान अभ्यास गरिएको छ। स्थानीय तहको निर्वाचनमा धेरै मत बदर भएपछि कार्यालयले यसपटक मतदाता शिक्षा लगायत मतदान अभ्यासलाई बढी जोड दिएको छ।
निर्वाचन आउन अब १७ दिन बाँकी रहँदा जिल्ला निर्वाचन कार्यालय स्याङ्जाले बिहीवार नमूना मतदान अभ्यास गरेको हो।
आसन्न प्रतिनिधिसभा र प्रदेशसभा सदस्य निर्वाचनमा सदर मत बनाउने र मतदान गर्ने प्रक्रियाका बारेमा जानकारी दिने उदेश्यले नमूना मतदान अभ्यास गरिएको जिल्ला निर्वाचन अधिकारी गुरुप्रसाद मरासीनीले जानकारी दिनुभयो ।
नमूना मतदान अभ्यासमा नगरपालिकाका कर्मचारी, स्वास्थ्य स्वयंसेविका र सेवाग्रही लगायतको सहभागिता थियो। मतदाता शिक्षा कार्यक्रममा वडाबाटै यिनै स्वास्थ्य स्वयंसेविका परिचालन गरिने भएको छ।
उम्मेदवारले पाएका चुनाव चिन्ह वाहेकका चिन्हहरु समावेशगरी प्रतिनिधिसभा र प्रदेशसभा उम्मेदवार सहित समानुपातिकतर्फका मतदान गरिएको छ। मतदान अभ्यासमा ५६ मत खसेको र १ मत बदर भएको थियो।
महिला, पुरुष, अशक्त र वृद्धवृद्धाको लाइन मिलाउने, मतदाता परिचयपत्र रुजु गर्ने, मतदान अधिकृतको हस्ताक्षर रुजु गर्ने र गोप्य स्थानमा पुगी उम्मेदवारलाई मत दिन सिकाइएको थियो।
बदर मत कम गर्न र मतदाता शिक्षा प्रभावकारी बनाउन जिल्लाका ११ वटै पालिकामा पनि नमूना मतदान अभ्यास गरिने भएको कार्यालयका सूचना अधिकारी रामचन्द्र गौतमले भन्नुभयो ।
कार्यालयले जिल्लाका १९९ मतदानस्थलमा खटिने मतदान अधिकृत तथा सहायक मतदान अधिकृत छनौटको प्रक्रिया अन्तिम चरणमा रहेको बताइएको छ। छनौटपछि उनीहरुलाई पनि प्रशिक्षण दिने भएको छ। स्याङ्जामा २ लाख ४४ हजार ८९ मतदाता छन। ती मध्ये १ लाख १९ हजार ३१० जना पुरुष, १ लाख २४ लाख ७७८ महिला र १ अन्य छन्।
