काठमाडौं २ पुस। नेपाली कांग्रेसको मधेसी तर्फको सहमहामन्त्रीमा शेरबहादुर देउवा प्यानलका महेन्द्र यादव विजयी हुनुभएको छ । उहाँले डा शेखर कोइराला प्यानलबाट उम्मेदवारी दिनुभएका रामकृष्ण यादवलाई पराजित गर्नुभएको हो । महेन्द्रले २०२६ मत ल्याएर विजयी यी हुनुभएको हो भने रामकृष्णले १८२० मत प्राप्त गर्नुभएको छ । रामकृष्ण २०६ मतको अन्तरले पराजित हुनुभएको हो ।
नेपाली कांग्रेसको थारुतर्फको सहमहामन्त्रीमा उमाकान्त चौधरी निर्वाचित हुनुभएको छ । उहाँ कृष्णप्रसाद सिटौला समूहबाट उम्मेदवारी दिनुभएको थियो ।उहाँले शेखर कोइराला पक्षका तेजुलाल चौधरीलाई पराजित गनुभएको हो ।
नेपाली काँग्रेसको पिछडिएको क्षेत्रतर्फको सहमहामन्त्रीमा बद्री पाण्डे विजयी हुनुभएको छ । पाण्डेले डा शेखर कोइराला प्यानलका पाण्डे विजयी हुनुभएको हो । उहाँले कांग्रेस सभापति शेरबहादुर देउवा प्यानलबाट उम्मेदवारी दिनुभएका कर्णाली प्रदेशका मुख्यमन्त्री समेत रहनु भएका जीवन बहादुर शाहीलाई पराजित गर्नुभएको हो । पाण्डेले २४११ मत ल्याएर विजयी हुँदा शाहीले २१३३ मत पाउनु भएको छ । शाही पाण्डेसँग २७८ मतान्तरले पराजित हुनुभएको हो ।
नेपाली कांग्रेसको सहमहामन्त्रीमा खस आर्यतर्फ किशोरसिंह राठौर निर्वाचित हुनुभएको छ । देवराज चालिसेलाई पराजित गर्दै किशोरसिंह राठौर निर्वाचित हुनुभएको हो । राठौरले २५७६ मत प्राप्त हुँदा चालिसेले २०५९ मत प्राप्त भएको हो । किशोरसिंह देउवा समूहका र देवराज कोइराला समूहबाट उम्मेदवारी दिनुभएको हो ।
मुस्लिमतर्फको सहमहामन्त्रीमा फर्मुल्लाह मन्सुर निर्वाचित हुनुभएको छ । फर्मुल्लाह मन्सुर शेरबहादुर देउवा समूहका हुनुहुन्छ । शेखर कोइराला समूहका शेख वकिललाई पराजित गर्नुभएको छ । मन्सुरले २७७६ मत प्राप्त गर्दा वकिलले १८७१ मत प्राप्त गर्नुभएको हो ।
दलिततर्फको सहमहामन्त्रीमा जीवन परियार विजयी हुनुभएको छ ।जीवन परियारले मानबहादुर विश्वकर्मालाई पराजित गर्नुभएको हो । कडा प्रतिष्पर्धा भएकाले दुवैबीच केही भोटको मात्र अन्तर छ । परियारले १९१९ मत ल्याउँदा विश्वकर्माले १८९२ मत ल्याउनुभएको हो । परियार शेखर कोइराला समूहका र विश्वकर्मा शेरबहादुर देउवा समूहका हुनुहुन्छ ।
नेपाली कांग्रेसको १४ औं महाधिवेश अन्र्तगत आदिवासी जनजाति सहमहामन्त्रीमा देउवा समूहका भीष्मराज आङदेम्बे निर्वाचित हुनुभएको छ । शेखर कोइराला समूहका उम्मेदवार विकास लामालाई ७९८ मतान्तरले हराउँदै आङ्देम्बे निर्वाचित हुनुभएको हो । विजयी आङ्देम्बेले २ हजार ७११ मत छ भने लामाले १ हजार ९१३ मत ल्याउनुभएको हो ।
नेपाली कांग्रेसको १४औं महाधिवेशन अन्तर्गत महिला सहमहामन्त्रीमा पदमा महालक्ष्मी उपाध्याय ‘डिना’ विजयी हुनुभएको छ । उहाँले २५३३ मत ल्याएर विजयी हुनुभएको हो । उहाँकी प्रतिष्पर्धी कमला पन्तले २१०५ मत ल्याउनुभएको छ । डिना शेरबहादुर देउवा समूहकी हुनुहुन्छ । कांग्रेस सहमहामन्त्रीको महिलातर्फ ४६३८ मत खसेको थियो ।