काठमाडौं, २९ जेठ । चीनको सिन्जियाङमा मानवता विरोधी अपराध गरिएको मानवअधिकारवादी संस्था एम्नेष्टी इन्टरनेशनलले जनाएको छ ।
उइगर र अन्य मुस्लिम अल्पसङ्ख्यकको बसोबास रहेको सिन्जियाङमा केन्द्रीय सत्ताबाट मानवता विरोधी अपराध भएको आरोप एम्नेष्टी इन्टरनेशनलले लगाएको हो ।
एक प्रतिवेदन निकाल्दै एम्नेष्टीले सिन्जियाङमा मानवता विरोधी अपराध भइरहेकाले अनुसन्धान गर्न संयुक्त राष्ट्रसङ्घसँग अपील गरेको छ ।
चीनले उइगर, काजाख र अन्य मुस्लिम समुदायका मानिसलाई सामूहिक रूपमा थुनामा राख्ने, निगरानी गर्ने र यातना दिने गरेको आरोप एम्नेष्टीको छ ।
चीनले सिन्जियाङमा नरसंहार गर्न खोजेको आरोप केही पश्चिमा देश र मानवअधिकारवादी समूहले लगाउँदै आए पनि चीनले भने खण्डन गर्दै आएको छ ।