कास्की १४ पुस । नेपाली कांग्रेस गण्डकी प्रदेश संसदीय दलको नेतामा सुरेन्द्र पाण्डे विजयी हुनु भएको छ ।
प्रतिस्पर्धी भोजराज अर्याललाई हराउँदै विजयी भएका सुरेन्द्र पाण्डेले १८ मत प्राप्त गर्नुभएको हो । अर्याललाई भने ८ मत प्राप्त भयो । निर्वाचनमा मत बदर भएको थियो ।
लामो समयसम्म चलेको छलफलमा सर्वसम्मत नेता चयनमा सहमति नजुटेपछि बुधबार दिउँसो १ देखि २ बजेसम्म मनोनयन दर्ता गरिएको थियो । दुवै जनाले मनोनयन फिर्ता लिन मानेनन् । त्यसपछि ३ देखि ४ बजेसम्म मतदान गरिएको निर्वाचन अधिकृत विष्णुप्रसाद लामिछानेले जानकारी दिनुभयो । पाण्डे संस्थापन पक्षधर हो भने अर्याल अर्का पक्षका ।
पाण्डेलाई विन्दुकुमार थापाको प्रस्ताव र टकराज गुरुङको समर्थन थियो । अर्याललाई महेन्द्रध्वज जिसी प्रस्तावक र पार्वती तामाङ समर्थक बसेका थिए । गण्डकी प्रदेशसभामा सबैभन्दा ठूलो दलको हैसियतमा रहेको कांग्रेसले प्रत्यक्षतर्फ १८ र समानुपातिकतर्फ ९ गरी २७ सिट जितेको छ ।
चुनावसम्मको पाँच दलीय गठबन्धन टुटेपछि कांग्रेस अहिले प्रतिपक्षको भूमिकामा रहने भएको छ ।