स्याङ्जा १५ बैशाख । गण्डकी प्रदेशका नवनियुक्त मुख्यमन्त्री सुरेन्द्रराज पाण्डेले शुक्रवार सपथ लिनु भएको छ । प्रदेश प्रमुख पृथ्वीमान गुरुङ समक्ष सपथ लिनुभएको हो ।
यसैबीच, मुख्यमन्त्री पाण्डेले मन्त्री मण्डल बिस्तार गर्नुभएको छ । उहाले नेपाली कांग्रेसबाट सरस्वती अर्याल तिवारी र नेकपा माओवादी केन्द्रकी प्रमुख सचेतक सुशीला सिंखडालाई मन्त्रीमा नियुक्त गर्नुभएको छ । नवनियुक्त मन्त्रीहरु तिवारी र सिंखडा दुबैले पद तथा गोपनीयताको सपथ लिनुभएको छ ।
नवनियुक्त मन्त्री तिवारी वालिङ निवासीे उहा समानुपातिकबाट प्रदेशसभा सदस्य हो । त्यस्तै, माओवादी केन्द्रकी सिंखडा गोरखा जिल्लाबाट समानुपातिक सांसद हुन् । उहाहरुलाई बिना विभागीय मन्त्रीको हैसियतमा सपथ खुवाइएको मुख्यमन्त्री तथा मन्त्री परिषद कार्यालयले जनाएको छ ।
यसैगरी, गण्डकी प्रदेशका नवनियुक्त मुख्यमन्त्री सुरेन्द्रराज पाण्डेले पोखराको चिप्लेढुङ्गास्थित विश्वेश्वरप्रसाद कोइरालाको सालिकमा माल्यार्पण गर्नुभएको छ । प्रदेशको मुख्यमन्त्री नियुक्त भई आज प्रदेश प्रमुख पृथ्वीमान गुरुङबाट पद तथा गोपनीयताको सपथ ग्रहण गरेलगत्तै उहाले चिप्लेढुङ्गा पुगी नेपाली कांग्रेसका संस्थापक एवं नेपालका पहिलो जननिर्वाचित प्रधानमन्त्री कोइरालाको सालिकमा माल्यार्पण गर्नुभएको हो ।
मुख्यमन्त्रीसँगै नवनियुक्तमन्त्री सरस्वती अर्याल तिवारीले पनि सालिकमा माल्यापर्ण गर्नुभएको थियो ।
मुख्यमन्त्री पाण्डेलाई नेपाली कांग्रेसका २७, माओवादीका ७ र नेकपा एकीकृत समाजवादीका १ जना सांसदको समर्थन रहेको छ ।
पाण्डेले उनीहरुको हस्ताक्षर सहित मुख्यमन्त्रीका लागि दाबी पेश गर्नुभएको थियो । यस अघि नेकपा एमालेका तर्फबाट मुख्यमन्त्री बन्नु भएका खगराज अधिकारीले यही वैशाख ९ गते प्रदेशसभामा विश्वासको मतका लागि प्रस्ताव पेश गर्नुभएको थियो । तर अधिकारीले विश्वासको मत पाउन सक्नु भएन । त्यसपछि गण्डकीमा कांग्रेसले मुख्यमन्त्री पाएको हो ।