स्याङ्जा १५ असार । एकल महिलाहरुलाई लक्षित गर्दै स्याङ्जामा नेतृत्व विकास एवं कानूनी साक्षरता तालिम दिइएको छ ।
सामाजिक विकास कार्यालय स्याङ्जाको आयोजनामा २ दिने तालिम दिइएको हो । तालिमको शुभारम्भ गर्दै प्रमुख जिल्ला अधिकारी सुनिता नेपालले महिलाहरु सामाजिक, राजनैतिक एवं आर्थिक रुपमा सक्षम बन्नका लागि पनि यस्ता प्रशिक्षण आवश्यक पर्ने बताउनुभयो ।
तालिमले आत्मविश्वास बढाउनुका साथै आफना आवश्यकता र हितका पक्षका खुलेर बोल्न सक्ने बनाउन सहजीकरण गर्ने उहाले भन्नुभयो । आफना हक, हित र अधिकारका बारेमा थापा पाउन, उपयोग गर्न पनि यस्ता तालिमको आवश्यकता रहेको ओैल्याउनुभयो ।
हिजो घरभित्र सिमित रहनु अवस्थालाई चिर्दै, सक्षम बन्दै सत्ता र सरकारका उच्च पदस्थ तहमा महिलाले नेतृत्व गरिरहेको बताउदै सबै महिलाहरु सक्षम र सबल बनेर स्वाबलम्बी बन्नु पर्नेमा जोड दिनुभयो ।
कार्यक्रममा प्रहरी उपरीक्षक शालिकराम शर्मा, पत्रकार महासंघ स्याङ्जाका उपाध्यक्ष भवानी अधिकारी, मानव अधिकारका लागि एकल महिला जिल्ला संजालका उपाध्यक्ष लक्ष्मी पौडेल लगायतले तालिममा सिकेका सीप, कलालाई कार्यान्वयन गर्न सुझाव दिनुभयो ।
दुई दिने प्रशिक्षणमा प्रमुख जिल्ला अधिकारी सुनिता नेपाल, जिल्ला न्यायधिवक्ता श्रीकला पौडेल, सामाजिक विकास कार्यालय स्याङ्जाका प्रमुख शोभाचन्द्र रेग्मी, पत्रकार महासंघका उपाध्यक्ष भवानी अधिकारीले लैगिंक हिंसा एवं घरेलु हिंसा, कानूनी उपचार, महिला तथा एकल महिलाका अवस्था, हक अधिकार, कानूनी ब्यवस्था, नेतृत्व विकास एवं बोल्ने कला र सामाजिक जिम्मेवारी र उत्तरदायित्वका बारेमा समेत प्रशिक्षण दिइएको कार्यालयका प्राबिधिक द्रोर्ण पनेरुले जानकारी दिनुभयो ।
सामाजिक विकास कार्यालयका प्रमुख शोभाचन्द्र रेग्मीको अध्यक्षतामा सम्पन्न कार्यक्रममा नायब सुब्बा द्रोर्ण पनेरुले संचालन गर्नुभएको थियो । नेतृत्व विकास तालिममा जिल्लाभरका १० वटा पालिकाकागरी ३० जना एकल महिलाको सहभागिता थियो ।