स्याङ्जा ११ मंसिर । पार्टीभित्र अन्तरघातगरी स्याङ्जा क्षेत्र नं. १ प्रतिनिधिसभा सदस्यका उम्मेदवार नारायणप्रसाद मरासिनीलाई हराएको भन्दै पुतलीबजार नगरपालिका १३ का इन्चार्ज लक्ष्मीपति सुवेदीमाथि केही युवाहरुले सांघातिक आक्रमण गरेका छन्।
पुतलीबजार नगरपालिका अभियानपथमा बस्दै आएको सुवेदीको घरभित्रै पसेर शनिवार साँझ युवाहरुले सांघातिक आक्रमण गरेको प्रहरीले जनाएको छ।
आक्रमणका कारण ४९ बर्षिय सुवेदी घाईते भएका छन्। उनको टाउको र शरिरका विभिन्न भागमा चोट छ। सुबेदीको टाउकोमा टाँका लगाईएको छ। जिल्ला अस्पताल स्याङ्जामा सामान्य उपचारपछि थप उपचारका लागि पोखरा लगिएको पारिवारिक स्रोतले जनाएको छ। तर, अवस्था भने सामान्य रहेको बताइएको छ।
आफना बुवालाई संरक्षण गर्न खोज्दा १८ बर्षिया छोरी बिनिता सुवेदीमाथि पनि आक्रमण भएको छ। उनको टाउको, खुट्टा र शरिरका विभिन्न भागमा चोट लागेको सु्वेदी पत्नी जानकी जानकारी दिनुभयो ।
एमालेतर्फका उम्मेदवार मरासिनी कांग्रेसतर्फका उम्मेदवार राजु थापासँग पराजित भएपछि अन्तरघातको आशंकामा एमाले समर्थित युवाहरुले एमाले वडा इन्चार्जलाई कुटपिट गरेका हुन्। सुवेदी एमाले पार्टी कार्यालय नजिकै रहेको एक घरमा बसेर ब्यवसाय गर्दे आएका छन्।
कुटपिटमा संलग्न रहेको भन्दै डोलबहादुर मल्ल, विष्णुबहादुर थापा र सुनिल गिरी बिरुद्ध जिल्ला प्रहरी कार्यालयमा उजुरी दर्ता भएको छ। कुटपिटमा संलग्न युवाहरु फरार छ। उनीहरुको खोजिकार्य भईरहेको स्याङ्जा प्रहरीले जनाएको छ।
सुबेदीलाई कुटपिट गर्नुपूर्व उनीहरुले एमाले पार्टी कार्यालय तोडफोड गरेको स्थानीयले जनाए।
एमाले स्याङ्जामा नारायणप्रसाद मरासिनी र पद्मा अर्याल खेमाबीच अन्तरघातको आरोप प्रत्यारोप तीव्र देखिएको छ। नेकपा एमालेका हालै सम्पन्न जिल्ला अधिवेशनदेखि मरासिनी र अर्यालबीच दुरी बढेको नेकपा एमालेका नेताहरु बताउदै आएका छन्।