स्याङ्जा ८ पुस । सुशासन प्रवद्र्धन र भ्रष्टाचार बिरुद्धको सहकार्यमा नागरिक समाज एवं नागरिक निगरानी संस्थाको भूमिकाको बिषयमा पोखरामा छलफल एवं अन्र्तक्रिया गरिएको छ ।
भ्रष्टाचार बिरुद्धको सहकार्य, सुशासनका लागि अपरिहार्य भन्ने मुल नाराका साथ अख्तियार दुरुपयोग अनुसन्धान आयोगको कार्यालय पोखरा र गण्डकी प्रदेशका ४ जिल्लामा गठित नागरिक निगरानी संस्थाबीच हिजो पोखरामा छलफल एवं अन्र्तक्रिया भएको हो ।
कार्यक्रममा बोल्दै आयोग कार्यालयका प्रमुख एवं सहसचिव पार्वती शर्माले भ्रष्टआचारणलाई निरुत्साहित बनाउनका लागि जिल्लामा स्थापित नागरिक निगरानी संस्थाले निगरानी एवं खबरदारी गर्न सुझाव दिनुभयो । संस्थागत विकासका लागि आयोगले कार्यबिधि बनाएर अघि बढ्ने बताउदै सूचना र समन्वयमा सहयोग गर्न जिल्ला स्थित संस्थालाई आग्रह गर्नुभयो ।
कार्यक्रममा नागरिक निगरानी संस्था स्याङ्जाका अध्यक्ष यादवराज शर्मा, कास्कीका रामबहादुर थापा, पर्वतका पृथ्वीनारायण शर्मा, वाग्लुङ्का राजेश शर्मा लगायतले जिल्ला स्थित वस्तुगत अवस्थाका बारेमा जानकारी गराउनुभएको थियो ।
गण्डकी प्रदेश अन्र्तगतका कास्की, स्याङ्जा पर्वत र वाग्लुङमा पहिलो पटक नागरिक निगरानी संस्था गठन भएका छन् । बिगत ३ बर्षअघि जिल्ला प्रशासन कार्यालय स्याङ्जामा बिधिवतरुपमा दर्ता भएको नागरिक निगरानी संस्थाले सुक्ष्मरुपमा आफना गतिबिधि अघि बढाउदै आएको छ ।
