स्याङ्जा १३ मंसिर । वालिङ् नगरपालिका सडक खाना महोत्सवको तयारीमा जुटेको छ । वालिङ्का स्थानीय उत्पादन, कला, संस्कृति र भेषभुषा सहित सामाजिक सदभाव कायम राख्ने उदेश्यले सडक महोत्सव गरिने भएको हो ।
आउदो साता पहिलो पटक सडक खाना महोत्सव गरिने भएको हो । वालिङ नगरपालिकाको आयोजनामा आँधीखोला करिडोर हुदै सुर्र्कोदी पुलसम्म ३ दिने प्रथम सडक खाना महोत्सव गरिने उपप्रमुख कबिता तिवारीले जानकारी दिनुभयो ।
स्थानीय खानाका परिकार, स्थानीय उत्पादन सहित स्थानीय कला र संस्कृतिको संरक्षण र प्रवद्र्धनकालागी सडक खाना महोत्सवको आयोजना गरिएको हो । महोत्सवमा विभिन्न जातिय भेषभुषा, संस्कृतिको प्रर्दशन र स्थानीय कलाकारहरुको प्रस्तुति रहनेगरी तयारी भैरहेको बताइएको छ ।
मंसिर १७, १८ र १९ गते हुने सडक खाना महोत्सवका लागी स्टल बुकिङ गर्न नगरपालिकाले आव्हान गरेको छ । स्टल राख्नका लागि मंसिर १५ भित्रै नगरपालिकामा जानकारी गराउन समेत आग्रह गरिएको छ ।
वालिङ नगरपालिका ८ स्थित पतञ्जली तथा वालिङ खेलमैदानको आसपासको भागदेखि आँधीखोला कोरिडोर हुँदै सुर्कौदी पुलसम्मको क्षेत्रमा स्टलहरु राखि खाना महोत्सव गरिने भएको हो । स्टलका लागी प्रतिदिन ५ सय रुपैँया तोकिएको छ ।
स्टलको संरचना भने स्वंय व्यक्ति वा संस्थाले निर्माण गर्नु पर्ने नगरप्रवक्ता पदमराज गुरुङले जानकारी दिनुभयो ।