स्याङ्जा १६ मंसिर । अपांगता सशक्तिकरण तथा सामुदायिक विकास केन्द्र पुतलीबजार स्याङ्जाको आयोजना तथा पुतलीबजार नगरकार्यपालिकाको सहयोगमा अपांगता सम्बन्धी सचेतना अभियान कार्यक्रम आइतवारदेखी सुरु भएको छ । स्याङ्जा सदरमुकाम स्थित त्रिभुवन आर्दश बहुमुखी क्याम्पसमा अध्ययरत छात्रछात्रालाई लक्षित गर्दे सो कार्यक्रम सुरु गरिएको हो ।
अभियानको उदघाटन गर्दै नगर उपप्रमुख देवी अर्यालले सबै ब्यक्ति एकै हुन र सबैले समान अवसर पाउनु पर्छ भन्ने मान्यताले पुतलीबजार नगरपालिका अघि बढेको बताउनुभयो । पछिल्लो समय अपांगता भएका ब्यक्तिले राम्रा र उदाहरणीय काम गरेर अन्य ब्यक्ति भन्दा फरक नदेखिएको प्रमाणित गरिसकेको उहाको भनाई छ । नगरपालिकाले अपांगता परिचयपत्र बितरण, स्वास्थ्य बिमा र स्याहारे भत्ता लगायतका कार्यक्रममा सहयोग गर्दै आएको जनाउदै आगामी दिनमा समेत यस्ता कामलाई निरन्तरता दिईने बताउनुभयो ।
कार्यक्रममा क्याम्पस प्रमुख अर्जुनबन्धु अर्याल, पत्रकार महासंघका जिल्ला उपाध्यक्ष भवानी अधिकारी, स्वतन्त्र विद्यार्थी यूनियन क्याम्पस इकाइ सभापति सविन रेग्मी लगायतले शुभकामना सहित अपांगता क्षेत्रका समस्या, चुनौती र अवसरका बारेमा आ आपना धारणा ब्यक्त गर्नुभएको थियो ।
क्याम्पस संचालक समिति सदस्य पृथ्वीप्रसाद पोखरेलको अध्यक्षतामा सम्पन्न कार्यक्रमको संचालन प्राध्यापक कृष्णप्रसाद लामिछानेले गर्नुभएको थियो ।
सोही कार्यक्रममा अपांगता समाज स्याङ्जा जिल्ला अध्यक्ष राम शर्मा पोखरेल, अपांगता विज्ञ एवं अपांगता सशक्तिकरण तथा सामुदायिक विकास केन्द्र स्याङ्जका अध्यक्ष युवराज पराजुली र सहजकर्ता नारायणप्रसाद रेग्मीले अपांगता सम्बन्धी अवधारणा, अपांगताका प्रकार, परिचयपत्र र स्वयंसेवक छनौट सम्बन्धी छुट्टाछुट्टै प्रशिक्षण दिनुभएको थियो ।
क्याम्पस कक्षा ११, १२ र स्नातक तहमा अध्ययरत छात्रछात्रा सहभागी थिए । सोही समूहबाट स्नताक तहमा अध्ययरत सन्ध्या पोखरेल, कक्षा ११ र १२ मा अध्ययरत नविना गोदार र मनोज बुढाथोकीले स्वयंसेवी भई सेवा गर्नकालागि आ आफना नाम शिफारिस गर्नुभएको छ ।
अभियान अन्र्तगत पुतलीबजार नगरपालिकाका ४ वटा बिद्यालय र क्याम्पसमा यस सम्बन्धी सचेतना कार्यक्रम कार्यक्रम गरेर सम्पन्न गरिने अपांगता सशक्तिकरण तथा सामुदायिक विकास केन्द्रले जनाएको छ ।