स्याङ्जा २० मंसिर । भीरकोट नगरपालिका १ बयँरघारीबजारमा क्षयरोग खोजपड्ताल शिविर गरिएको छ। शिविरमा आएका मध्ये ११ जनामा क्षयरोगका संक्रमण पुष्टि भएको छ भने थप ३९ जना शंकास्पद देखिएका छन ।
स्याङ्जाका एघार पालिकामध्ये भीरकोट एक हो। यसरी हेर्दा यहाँ परिक्षण गरिएका मध्ये २ दशमलब ४ प्रतिशतमा क्षयरोगको संक्रमण देखिएको छ ।
शिविरमा आएका मध्ये ४ सय ५० जनाले स्वास्थ्य परिक्षण गरेका थिए । ती मध्ये ३९ जनामा क्षयरोग हुनसक्ने आशंकामा खकारको नमूना परिक्षणका लागि जीन एक्सपर्ट ल्याब पठाइएको स्वास्थ्य कार्यालयका क्षयरोग अधिकृत बिष्णु सुवेदीले जानकारी दिनुभयो
जापान नेपाल स्वास्थ्य तथा क्षयरोग अनुसन्धान संस्था (जन्त्र) को आयोजनामा स्वास्थ्य कार्यालय स्याङ्जाको समन्वय तथा क्षयरोग उपचार केन्द्र पोखराको सहकार्यमा भीरकोट शिविर गरिएको हो।
एआई पद्धतीको डिजिटल पोर्टेबल आधुनिक मेशिनबाट बिशेषज्ञ चिकित्सक सहितको टोलीले छातीको एक्सरे बिधिबाट स्वास्थ्य परिक्षणमा गरिएको थियो।
दिर्घरोगी, बयोबृद्धा, क्षयरोगको सम्पर्कमा आएका जोखिमपूर्ण समूहलाई लक्षित गर्दे शिविर आयोजना गरिएको भीरकोटका उपप्रमुख भगवती अर्यालले बताउनुभयो । लाज र डरले रोग लुकाएर बस्न नहुने उनको भनाई छ। सबै स्वास्थ्यसंस्थाबाट निशुल्क प्राप्त हुने औषधी नियमित सेवन गरेमा समयमै रोग निको हुने हुदाँ नडराउन, नआत्तिनु तथा नलुकाउन उहाको सुझाव छ।
क्षयरोगको औषधी सबै स्वास्थ्य संस्थाबाट निःशुल्क पाइन्छ। नियमित र चिकित्सका सल्लाह बमोजिम औषधी सेवन गरे क्षयरोग निको हुन्छ । निरन्तर ज्वरो आउने, खोकी लाग्ने, टाउको दुख्ने, वाकवाक हुने, खकारमा रगत लगायतका लक्ष्यण देखिएमा क्षयरोग हुन सक्ने अनुमान गर्दै स्वास्थ्यकर्मीको सल्लाह लिन क्षयरोग उपचार केन्द्र पोखराका निर्देशक डा. सुनिलराज गौतमको भनाई छ ।
आर्थिक वर्ष २०८०–०८१ मा क्षयरोगका संक्रमणबाट १४ जनाको मृत्यु भएको स्वास्थ्य कार्यालय स्याङ्जाका प्रमुख केशव चापागाईंले जानकारी दिनुभयो । उहाका अनुसार गत आर्थिक वर्षमा २८१ जना नयाँ क्षयरोगी भेटिएको छ।
नगरपालिका मध्ये वालिङ नगरपालिकामा ७९ जना, पुतलीबजारमा ४३, गल्याङमा ५०, चापाकोटमा ३३, भीरकोटमा २३ जना छन ।
यसैगरी, फेदीखोला गाउँपालिकामा छ जना, कालीगण्डकीमा २३, हरिनासमा ५, विरुवामा १०, अर्जुनचौपारीमा ५ र आँधीखोलामा ४ जना क्षयरोगी रहेको स्वास्थ्य कार्यालयले जनाएको छ। यहाँको प्रतिलाख जनसंख्या मध्ये १३४ जना क्षयरोगी भेटिएको कार्यालयले जनाएकोे छ ।