स्याङ्जा ८ असोज । जिल्ला प्रशासन कार्यालय स्याङ्जाको आयोजना तथा आँधीखोला गाउँपालिकाको ब्यवस्थापनमा सचेतनामूलक अन्तरक्रिया कार्यक्रम गरिएको छ । स्थानीय तहमा शान्ति सुरक्षा, अपराध नियन्त्रण र सेवा प्रवाह सम्बन्धी मंगलबार आँधीखोला गाउँपालिकामा सचेतनामूलक कार्यक्रम गरिएको हो ।
कार्यक्रमको उदघाटन गर्दै गाउँपालिकाका अध्यक्ष विश्व पौडेलले स्याङ्जा प्रशासन कार्यालय मार्फत उपलब्ध हुने सेवा प्रवाहका बारेमा पालिकामा बसेर जानकारी पाउनु सुखद पक्ष रहेको बताउनुभयो । प्रमुख जिल्ला अधिकारी समक्ष आफना समस्या तथा कठिनाइएका बारेमा प्रत्यक्ष जानकारी गराउन पाएको अवसरको सदुपयोग गर्न सुझाव दिनुभयो ।
पालिकाबासीको सकारात्मक सहयोगले आँधीखोलालाई समुन्नत बनाउने उहाले बताउनुभयो । उहाले भन्नुभयो, ‘जसले पालिकामा बसेर सुखदुखमा साथ दिएका छन् उहाहरुका सल्लाह सुझाब ग्रहण गर्दै अघि बढ्ने र पालिकाको विकास र समृद्धीमा जुट्ने हो ।’ गाउँपालिकाको विकासका लागि सबै राजनीतिक दलहरुबीच एक मत रहेको उहाले सुनाउनुभयो ।
प्रमुख जिल्ला अधिकारी सुनिता नेपालले प्रशासन कार्यालयबाट हुने सेवा प्रवाहका बारेमा जानकारी गराउनुभयो । नागरिकता, हिंसा, राष्ट्रिय परिचयपत्र, संस्था दर्ता, नविकरणसंगै अन्य बिबिध सेवा सम्बन्धी स्थानीयबासीसंग साक्षात्कार गर्नुभयो ।
प्रजिअ नेपालका अनुसार, ‘कुनै पनि बालबालिकाले जन्म दर्ता र महिला (आमा) नागरिकता बिहिन हुन हुदैन । यसतर्फ स्वास्थ्य शाखा र स्थानीय पालिकाले ध्यान दिनुपर्छ । गर्भवती परिक्षण गराउन जाँदा नागरिकता र नावालकलाई पहिलो खोप दिने बेलामा जन्मदर्ता खोजेमा नागरिकता र जन्मदर्ता बिहीनताको समस्या विस्तारै समाधान हुदै जानेछ ।’
सामाजिक ब्यवहार सुधार सम्बन्धी कानून निर्माण गर्न समेत स्थानीय पालिकालाई प्रजिअ नेपालको सुझाव छ ।
प्रहरी उपरीक्षक शालिकराम शर्माले लागु औषध, मानव वेचबिखन, हिंसा, दुब्र्यवहार, आत्महत्या, साइवर क्राइम, मदिरा सम्बन्धी कार्यपत्र प्रस्तुत गर्नुभएको थियो । जिल्लामा भए गरेका बिबिध घटना लगायत प्रहरीले गर्दै आएका बिभिन्न सामाजिक कामका बारेमा जानकारी गराउनुभयो । नैतिक तथा संस्कार शिक्षाको आवश्यकता औल्याउदै प्रउ शर्माले स्थानीय पाठ्यक्रममा नैतिक तथा सदाचारयुक्त शिक्षा निर्माणमा सुझाव दिनुभयो ।
कार्यक्रममा सहायक प्रमुख जिल्ला अधिकारी दिपक पौडेलले स्याङ्जा प्रशासन कार्यालयबाट हुने सम्पूर्ण सेवा तथा सुबिधाका बारेमा कार्यपत्र प्रस्तुत गर्नुभयो । प्रशासन कार्यालयको क्षेत्र सिमित नरहेको जनाउदै प्रशासनिक सेवा संगै विपद सम्बन्धी राहत तथा भौतिक पूर्वाधार, न्याय लगायतका बारेमा जानकारी गराउनुभयो ।
प्रमुख जिल्ला अधिकारी सुनिता नेपालको अध्यक्षतामा सम्पन्न कार्यक्रममा वडा अध्यक्ष कमलप्रसाद पौडेलले स्वागत र प्रशासन कार्यालयका नायब सुब्बा रामप्रसाद पौडेलले गर्नुभएको थियो ।
सोही कार्यक्रममा वडा सदस्य डिलबहादुर क्षेत्री, स्वास्थ्यकर्मी डिल्लीराम अधिकारी, टोल संयोजक मुक्ति देवकोटा र कुलप्रसाद पोख्रेल लगायतले आ आफना तथा सामुहिक समस्या सुनाउनुभएको थियो । सो का बारेमा प्रजिअ नेपालले समाधान सहित राय, सुझावका बारेमा जानकारी गराउनु भएको थियो ।
कार्यक्रममा आमा समूह, शिक्षक, बिद्यार्थी, जनप्रतिनिधी, क्लव लगायत गाउँपालिकाबासीको उल्लेख्य सहभागिता थियो ।