स्याङ्जा २१ माघ । आज श्रीपञ्चमी तथा सरस्वती पुजा । सरस्वती पूजाका दिन पारेर पुतलीबजार नगरपालिका वडा नं. ३ मा हिजो वडा कार्यालय भवन उदघाटन गरिएको छ ।
गोदगोदे कुमालगाउँमा रहेको सो सामुदायिक भवनलाई पुननिर्माण सहित रंगरोगनगरि वडा कार्यालय बनाइने भएको हो ।
कार्यालय भवनको उदघाटन गर्दै नगरप्रमुख तुलसीराम रेग्मीले कार्यालयबाट प्रवाह हुने सबै खालका सेवा, सुबिधा सहजरुपमा उपलब्ध गराई आमनागरिकलाई सहज बनाउन जनप्रतिनिधि तथा कर्मचारीलाई सुझाव दिनुभयो । नागरिकका समस्याको समाधान गर्दै राज्यद्धारा उपलब्ध हुने सेवा सुबिधालाई छितो, छरितो सेवा उपलब्ध गराउनु पर्नेमा उहाले जोड दिनुभयो । नगरपालिकाले सबै वडा कार्यालयको आफनै भवन निर्माण गरिने अभियानलाई अघि बढाएको पनि जानकारी गराउनुभयो ।
कार्यक्रममा उपप्रमुख देवी अर्याल, नगर प्रवक्ता मनोज पौडेल, नेपाली कांग्रेस ३ का वडा सभापति कमलकान्त उपाध्याय, स्थानीयबासी हुमबहादुर कुमाल र रामचन्द्र गिरी, टोल विकास संस्थाका अध्यक्ष महेन्द्र रेग्मी लगायतले भाडामा रहेको कार्यालयलाई यहा स्थानान्तरण गरिनु सुखद पक्ष रहेको बताउनुभयो ।
वडा अध्यक्ष राजेन्द्रप्रसाद श्रेष्ठको अध्यक्षतामा सम्पन्न कार्यक्रममा सदस्य अमिरबक्स मियाले स्वागत एवं सचिव राजुप्रसाद रेग्मीले संचालन गर्नुभएको थियो ।
झण्डै डेढ दशकअघि निर्माण गरिएको भवनको पुननिर्माण गरि कार्यालय भवन बनाइएको हो । पुतलीबजार नगरपालिका ३ को वडा कार्यालयले गोदगोदे कुमालगाउबाट फागुन १ गतेदेखि सेवा प्रवाह गर्नेगरी जानकारी गराएको छ ।