स्याङ्जा ६ मंसिर । पुतलीबजार नगरपालिका वडा नं. १ ले ३ जना यू १९ महिला क्रिकेट खेलाडी सहित क्रिकेट संघ स्याङ्जाका अध्यक्ष दिवाकर थापालाई सम्मानपत्रले सम्मान गरेको छ ।
वडा कार्यालयमा आयोजित सम्मान कार्यक्रममा नगर कार्यपालिका सदस्य अनिता रुचाल, वडा सदस्यहरु जानुका लम्साल, हिटलर पौडेलले विश्वकपका लागि छनौटमा परेका खेलाडी सहित अध्यक्षलाई थापालाई सम्मान, बधाई तथा शुभकामना दिनुभएको थियो ।
स्याङ्जा अनि पुतलीबजार सहित वडा नं. १ बाट प्रतिनिधित्व गर्दै विश्वमा आफु सहित जिल्लाकै नाम परिचित गराएकोमा वक्ताहरुले खुशी ब्यक्त गर्दै आउने दिनमा वडा कार्यालयले खेलकूदका क्षेत्रमा आवश्यक सहयोग गर्ने बताउनुभयो । जिल्ला क्रिकेट संघका अध्यक्ष दिवाकर थापाले पनि छनौट हुन पाएकोमा खुशी ब्यक्त गर्दै कार्यालय र जनप्रतिनिधीबीच सहकार्य गर्दे अघि बढ्ने बताउनुभयो ।
वडा अध्यक्ष उत्तमप्रसाद श्रेष्ठकोे अध्यक्षतामा सम्पन्न कार्यक्रममा वडा सदस्य बिष्णुकुमार श्रेष्ठले स्वागत एवं सचिव रामप्रसाद पोखरेलले संचालन गर्नुभएको थियो ।