स्याङ्जा ९ बैशाख । नेपाल कम्युनिष्ट पार्टी एमाले स्याङ्जाले ५ जना अग्रज नेताहरुलाई सम्मान गरेको छ । कम्युनिष्ट आन्दोलनदेखि हालसम्म निरन्तर क्रियाशिल नेताहरुलाई सम्मान गरेको हो ।
कम्युनिष्ट पार्टीको ७६ औं स्थापना दिवसको अवसर पारेर मंगलबार एमाले स्याङ्जाले जिल्लाका अग्रज कम्युनिष्ट नेताहरुलाई सम्मान गरेको हो । नेकपा एमालेले पार्टी कार्यालयमा आयोजित ७६ औं स्थापना दिवसका अवसर पारेर पार्टीको राजनीतिमा अमूल्य योगदान गर्नुभएका भन्दै अगुवा नेताहरुलाई सम्मान गरेको जनाएको छ ।
सम्मान पाउनु हुनेमा वालिङ नगरपालिका निवासी चक्रबहादुर पराजुली, पुतलीबजार नगरपालिका निवासी द्धय ध्रुव अधिकारी र रामबहादुर थापा, गल्याङ नगरपालिका निवासी ढाकाराम अर्याल र चापाकोट नगरपालिका निवासी इन्दिरा विश्वकर्मा रहनु भएको छ । उहाँहरु सबैलाई अबिर, माला, दोसल्ला सहित प्रमाणपत्रले सम्मान गरिएको हो ।
कार्यक्रममा जिल्ला इन्चार्ज सीता सुन्दास, केन्द्रीय सदस्य सीमा क्षेत्री, महेन्द्र थापा मगर, नारायण मरासिनी, चक्रबहादुर पराजुली, सुर्यप्रसाद गैह्रे लगायतका बक्ताहरुले बैशाख ९ गते कम्युनिष्ट पार्टीहरुको उत्सवको दिन रहेको बताउनु भएको छ ।
