स्याङ्जा १५ फागुन । फागुन १५ गते बिहीवार स्याङ्जामा ४३ औं राष्ट्रिय मगर एकता दिवस मनाइएको छ । पुतलीबजार नगरपालिकामा मगर समुदायले धुमधामका साथ दिवस मनाएका हुन ।
राष्ट्रिय मगर संघ स्थापना दिवसको अवसरमा मगर भेषभुषा र झाँकी सहित विविध साँस्कृतिक कार्यक्रमगरी राष्ट्रिय मगर एकता दिवस मनाईएको हो ।
नेपाल मगर संघ पुतलीबजार नगरसमितिको आयोजना र नेपाल महिला मगर संघ पुतलीबजारको सहआयोजनामा सदरमुकाम स्थित सिटि हलमा भएको शुभकामना आदानप्रदान सहितको बिबिध सांस्कृति एवं सम्मान कार्यक्रमलाई सम्बोधन गर्दै नेपाल जनजाती आदिवासी आयोगका सदस्य रिना राना मगरले सबै मगर समुदायलाई एकबद्ध भई आफना समुदायका हक, हित र अधिकारका पक्षमा काम गर्न सुझाव दिनुभयो ।
गण्डकी प्रदेश सरकारले मगर भाषालाई सरकारी कामकाजको भाषाको रुपमा उपयोग गर्न लागेको सुखद पक्ष रहेको उहाँले भन्नुभयो । कला, संस्कृति, धर्म, संस्कारलाई जोगाउदै पुस्तान्तरण गर्नु पर्ने जनाउदै मगर समुदायका भाषा, कला, संस्कृतिको जगेर्ना गर्दे अघि बढ्नुमा उहाले जोड दिनुभयो ।
उपप्रमुख देवी अर्यालले मगर दिवसको शुभकामना ब्यक्त गर्दे समुदायका लागि पुतलीबजार नगरपालिकाले आवश्यक सहयोग गर्ने बताउनुभयो ।
जिल्ला समन्वय समितिका सदस्य नेमबहादुर राना, मगर संघका गण्डकी प्रदेश सचिव नारायण थापा, जिल्ला मगर संघका अध्यक्ष सागर थापा, वरिष्ट उपाध्यक्ष लक्ष्मी थापा, पुतलीबजार मगर संघका पूर्वनगर अध्यक्ष लीलबहादुर राना, नेपाली कांग्रेसका महाधिवेशन प्रतिनिधि धनकुमारी थापा, एन्फाका अध्यक्ष मुक्तबहादुर राना, विरेन्द्र नगर इकाई अध्यक्ष सुनिल आलेमगर लगायतले शुभकामना मन्तब्य ब्यक्त गर्नुभएको थियो ।
नेपाल मगर संघ पुतलीबजारका अध्यक्ष भिम रानाको अध्यक्षतामा सम्पन्न कार्यक्रममा उपाध्यक्ष थमनसिंह रानाले स्वागत, बाडखोला प्रगतीनगर इकाई अध्यक्ष भरत रानाले धन्यवाद एवं सदस्य खुमबहाद्र रानाले संचालन गर्नुभएको थियो । यसैगरी, मगर समुदायबाट डाक्टर र इन्जिनियर भएका १६ जनालाई सम्मान गरिएको थियो । दिवस मनाउन सहयोग गर्ने सहयोगदाता १५ जनालाई सम्मान गरिएको थियो ।
औपचारिक कार्यक्रमअघि मगर भेषभुषा र पञ्चेबाजा सहितको झाँकी तथा र्याली प्रस्तुत गरिएको थियो । पुतलीबजार नगरपालिका १ शिक्षाचोक प्रगतीनगरदेखी सुरु भएको र्याली प्रगतीनगर घुम्ति, बैकरोड, शहिदचोक हुदै स्याङ्जा सिटी हलमा आएर औपचारिक कार्यक्रममा परिणत भएको थियो ।
राष्ट्रिय मगर एकता दिवस मनाउनका लागि स्याङ्जाका ११ पालिका मध्ये ८ वटा स्थानीय पालिकाले सार्वजनिक बिदा समेत दिएका थिए । यसैगरी, बिभिन्न स्थानीय पालिकामा समेत बिबिध कार्यक्रमगरी मगर एकता दिवस मनाइएका छन ।
