स्याङ्जा १५ पुस । अमोर सेवा बालगृहमा पौष १४ र १५ गते फरक दृश्य देखियो । प्रायस् पढाइ लेखाइ र अन्य शैक्षिक गतिविधिमा रहने बालगृहका बालबालिका कोही दुना टपरी बुन्दै थिए त कोही ज्योती बाल्न प्रयोग हुने बाती बनाउदै थिए भने कोही डोको र नाम्लो बुन्दै थिए ।
यो सामाजिक विकास कार्यालय स्याङ्जाको आयोजनामा भएको जेष्ट नागरिकमा भएको ज्ञान,सीप र अनुभव अन्तरपुस्ता हस्तान्तरणको कार्यक्रमको दृश्य हो । बालगृहमा रहनुभएका ३८ जना बालबालिकालाई हाम्रो मौलिक परम्परागत सीप र ज्ञान हस्तान्तरण गर्ने उद्धेश्यले बालबालिकालाई टपरी र दूना बुन्न, बाती बनाउन, डोका तथा डस्टबिन बनाउन विभिन्न क्षेत्रमा सीप हासिल गर्नु भएका जेष्ठ नागरिकहरुले प्रशिक्षण गरिएको थियो।
कार्यक्रममा जेष्ठ नागरिकले बालबालिकालाई भजन कृतन समेत सिकाउनु भएको थियो । कार्यक्रममा बोल्नुहुदै बालगृह सञ्चालिका कमला पराजुलीले आफ्ना बालगृहमा रहेका छोराछोरी हरेक क्षेत्रमा सक्षम रहेको र छिटो समयमै विभिन्न सीप सिक्न सफल भएकोमा खुसी व्यक्त गर्नु भयो । फेदीखोला गाउँपालिका वडा नं १ का वडा अध्यक्ष अमृत क्षेत्रीले हाम्रो हरेक सीपलाई रोजगारसँग जोड्दै अगाडी बढ्नु पर्ने कुरामा जोड दिनु भयो ।
सामाजिक विकास कार्यालय स्याङ्जाका कार्यालय प्रमुख जीवन पौडेलले जेष्ठ नागरिकमा विभिन्न क्षेत्रको अनुभव र सीप रहेको बताउदै त्यसलाई पुस्तान्तरण गर्दै जानु पर्ने र त्यसमा सामाजिक विकास कार्यालय स्याङ्जाले पुलको काम गर्न तयार रहेको कुरा बताउनु भयो । साथै बालगृह सञ्चालन गरेर मानव कल्याणको महान् कार्य गरेको भनेर बालगृह सञ्चालिका कमला पराजुलीलाई धन्यबाद व्यक्त गर्नु भयो ।
कार्यक्रममा सामाजिक विकास कार्यालय स्याङ्जाको तर्फबाट बालसाहित्य सँग सम्बन्धित ३० वटा पुस्तकहरु हस्तान्तरण गरिएको थियो ।