स्याङ्जा २७ माघ । स्याङ्जा अपाङ्ग समाज स्याङ्जाको आयोजना, सामाजिक विकास कार्यालय तथा कृषि ज्ञान केन्द्रको आर्थिक तथा प्राविधिक सहयोगमा अपाङ्गता भएका व्यक्तिहरुलाई समुदायमा आधारित पुनस्र्थापना कार्यक्रम अन्तर्गत बेमौसमी तरकारी खेतीसम्बन्धी २ दिने तालिम सम्पन्न भएको छ ।
कार्यक्रममा बोल्दै उपप्रमुख देवी अर्यालले अपाङ्गता भएका व्यक्तिहरुको लागि यस्ता सिप मूलक कार्यक्रम गर्दै विभिन्न क्षेत्रको क्षमता विकासमा समेत ध्यान दिनु पर्ने कुरामा जोड दिनुभयो । सोही अवसरमा उहाँले स्थानीय तहले माथिल्लो तहका सरकार, सम्बन्धीत संघसंस्थासँग सहकार्य गरेर अपाङ्गता भएका व्यक्तिको क्षमता विकास र हकअधिकार स्थापित गर्न लागि परेको बताउनुभयो ।
कार्यक्रममा सामाजिक विकास कार्यालयका प्रमुख जीवन पौडेल, कृषि ज्ञान केन्द्रका बागबानी विकास अधिकृत विकास बि.क, लगायतले शुभकामना मन्तब्य ब्यक्त गर्नुभएको थियो ।
प्राविधिक सहायक विनिता शर्मा र कृषि तथा वन विज्ञान विश्वविद्यालयका प्रशिक्षार्थी विद्यार्थीहरुले तरकारी खेतीसँग सम्बन्धित विविध क्षेत्रमा सहजिकरण गर्नुभएको थियो । कार्यक्रममा २३ जना अपाङ्गता भएका व्यक्तिहरुलाई तालिम दिइएको र कृषिऔजार, बीउ र आवश्यक अन्य सामाग्री वितरण गरिएको थियो ।
अपाङ्ग समाज स्याङ्जाका अध्यक्ष राम शर्मा पोखरेलको अध्यक्षतामा सम्पन्न कार्यक्रममा अपाङ्गता सशक्तिकरण तथा सामुदायिक विकास केन्द्र नेपालका अध्यक्ष युवराज पराजुलीले कार्यक्रमको सहजीकरण गर्नुभएको थियो ।