स्याङ्जा १५ मंसिर । लैगिंक हिंसा बिरुद्धको १६ दिने अभियान अन्र्तगत भीरकोटमा महिला पञ्चेबाजा प्रतियोगिता हुने भएको छ ।
एकिकृत सेवा कार्यालय स्याङ्जाको आयोजना र भीरकोट नगरपालिकासँगको समन्वयमा यही मंसिर २४ गते महिला समुहबीच पञ्चेबाजा प्रतियोगिता हुने भएको हो । बयरघारी सिसौघारी स्थित भीरकोट खेलमैदानमा प्रतियोगिता गरिने भएको कार्यालय प्रमुख जीवन पौडेलले जानकारी दिनुभयो ।
गीत तथा पञ्चेबाजा मार्फत् महिला हिंसा विरुद्ध आवाज बुलन्द गरिने भएको हो । उहाले प्रतियोगिताले मौलिक संस्कृति जगेर्ना र महिला आवाज तथा अधिकार स्थापनामा टेवा पुग्ने विश्वास व्यक्त गर्नुभयो । स्याङ्जामा ‘प्रविधिको सही प्रयोग गरौं, लैङ्गिक हिंसा अन्त्य गरौ’ भन्ने नाराकासाथ लैंगिक हिंसा बिरुद्धको अभियान जारी छ ।
पञ्चेबाजा प्रतियोगीतामा प्रतिसमूहबाट बाद्यबादन, गायन र नृत्य सहित १३ जना सहभागि हुन पाउनेछन्। महिला अधिकार, नारी जागरण, महिला हिंसा र यसको अन्त्य जस्ता विषयवस्तु समेटेर गीत गाउँदै उक्त गीतको तालमा पञ्चेबाजा बजाउनु पर्नेछ ।
प्रतियोगिताका विजेताहरूले नगद पुरस्कार, मेडल र प्रमाणपत्र पाउनेछन भने सहभागी सबैलाई यातायात खर्चको समेत व्यवस्था गरिएको आयोजकले जनाएको छ ।
प्रतियोगितामा सहभागी हुन चाहने महिला समुहले यही मंसिर २० गतेसम्म टिम दर्ता गर्नुपर्ने छ । कार्यक्रममा ख्यातिप्राप्त राष्ट्रिय कलाकारद्धारा सांगीतिक प्रस्तुतिको साथै महिला अधिकारकर्मीद्वारा लैंगिक हिंसा सम्बन्धी सचेतना कार्यक्रम समेत हुने बताइएको छ ।
यही मंसिर ९ गतेदेखि सुरु भएको लैंगिक हिसा बिरुद्धको १६ दिन अभियानको २४ गते अन्तिम दिन हो ।