स्याङ्जा २० बैशाख । शुक्रवार र शनिवार स्याङ्जामा एक घर र उद्योगमा आगलागी भयो। आगलागीबाट झण्डै ३५ लाख मूल्य बराबरको क्षति पुगेको प्रहरीको अनुमान छ ।
पुतलीबजार नगरपालिका – ७ रयालेस्थित खिमबहादुर खत्रीको घरमा आगलागीभै पूर्णरुपमा जलेको छ ।
ढुङ्गा, माटो र जस्ता पाताले छाएको दुई तले घरमा बिजुली सर्ट भै आगलागी भएको प्रहरी निरीक्षक प्रवेश तिवारीले जानकारी दिनुभयो ।
आगलागीबाट घर र घरभित्र राखिएका ६ तोला सुनका गरगहना, ७० हजार नगद सहित घरभित्रका भाडाकुडा तथा लत्ताकपडा जलेको प्रहरीले जनाएको छ। आगलागीका कारण करिब २० लाख मूल्य बराबरको क्षति भएको प्रहरीको दावी छ ।
यसैगरी, वालिङ् नगरपालिका – ६ मिर्दीस्थित सिरक डसना उद्योगमा आगलागी हुदाँ करिब १४ लाख ४० हजार मुल्य बराबरको क्षति पुगेको प्रहरीले जनाएको छ ।
शुक्रवार दिउँसो आलमदेवी सिरक डसना उद्योग चलिरहेको अवस्थामा बिजुली सर्ट हुँदा आगलागी भएको प्रहरीले जनाएको छ ।
आगलागीबाट कपडा पेल्ने मेसिन लगायत फाइवर लत्ताकपडा जलेर नष्ट भएको प्रहरी निरीक्षक प्रवेश तिवारीले जानकारी दिन्भयो । आगलागी भएका घर र उद्योग दुबैमा बिद्युत्तीय लाइन सर्ट भएर आगलागी भएको बताइएको छ।