काठमाण्डौं, १८ भदौ । नेपाली काँग्रेसको १४ औं महाधिवेशन सम्बन्धी निर्वाचन निर्देशिकालाई थप समावेशी बनाइएको छ । समावेशी समूहका नेताहरूले विरोध जनाएपछि निर्देशिका सच्चिएको छ ।
बिहीवार साझ वरिष्ठ नेता रामचन्द्र पौडेल, सहमहामन्त्री प्रकाशशरण महत, नेता मिनेन्द्र, मानबहादुर विश्वकर्मा र जीवन परिवारले प्रधानमन्त्री तथा पार्टी सभापति शेरबहादुर देउवासँगको परामर्शपछि निर्देशिका सच्याउनुभएको हो । अब महिला, दलित, आदिवासी जनजाति, खस आर्य, मधेशी, मुस्लिम, थारु, अल्पसंख्यक वा अपाङ्गता प्रतिनिधित्व थप सुनिश्चित गरिएको छ । अब कुनै पनि वडामा एक जना मात्र क्रियाशील सदस्य भएको अवस्थामा पनि कार्यसमिति सदस्य र क्षेत्रीय प्रतिनिधिमा हुने व्यवस्था गरिएको छ । यसअघि जनसंख्याका आधारमा प्रतिनिधित्व हुने व्यवस्था गरिएको थियो ।
उक्त व्यवस्था अब सबै कलस्टरका हकमा लागू हुने गरी निर्देशिका संशोधन गरिएको काँग्रेस मुख्यसचिव कृष्णप्रसाद पौडेलले जानकारी दिनुभयो । योसंगै, मुस्लिम आरक्षण कोटा हटाएको भन्दै नेपाल मुस्लिम संघ स्याङ्जाले नेपाली कांग्रेस पार्टी कार्यालयमा भएको धर्ना पनि टुंगीएको छ ।