कास्की १४ पुस । गण्डकी प्रदेशसभा सदस्यहरूले पद तथा गोपनीयताको शपथ लिएका छन् ।
प्रदेशसभाको हल नदीपुरमा बिहीवार दिउँसो १ बजे प्रदेशसभाका ज्येष्ठ सदस्य मित्रलाल बस्यालले शपथ गराउनुभएको हो । ज्येष्ठ सदस्यको रूपमा बस्यालले बुधबार प्रदेश प्रमुख पृथ्वीमान गुरूङसँग शपथ लिनुभएको थियो । उहाले बिहीबार ५९ सांसदलाई शपथ गराउनु भएको हो ।
५७ जनाले नेपाली भाषा र ३ जनाले आफ्नो मातृभाषामा शपथ लिएका छन् । ६० सदस्यीय गण्डकी प्रदेशसभामा ३६ प्रत्यक्ष र २४ समानुपातिक निर्वाचन प्रणालीबाट निर्वाचित भएका छन् ।
संसद्मा ५ दलको सहभागिता छ । २७ सिट ल्याएको नेपाली कांग्रेस संसद्मा सबैभन्दा ठूलो दलको रूपमा सहभागी हुनेछ । कांग्रेस ठूलो दल भए पनि प्रतिपक्षमा रहने निश्चितजस्तै छ । यसैगरी, २२ सिट ल्याएको एमाले दोस्रो स्थानमा रहेको छ भने ८ सिट ल्याएर माओवादी केन्द्र तेस्रो स्थानमा छ । समानुपातिक प्रणालीबाट २ सिट जितेको राष्ट्रिय प्रजातन्त्र पार्टी र स्वतन्त्रबाट चुनाव जितेका दीपक मनाङे प्रवेश गरेसँगै एकीकृत समाजवादी पनि संसद्मा प्रवेश गरेको छ ।
त्यस्तै प्रदेश प्रमुख गुरूङले १८ गते संसद्को पहिलो बैठक आह्वान गर्नुभएको छ । केन्द्रको नयाँ गठबन्धनसँग गण्डकीमा पनि सरकार बनाउने बहुमत पुग्छ ।
गण्डकीमा सरकार बनाउन ३१ सांसदको आवश्यक पर्छ । यस्तै सरकारको नेतृत्व कसले लिने भनेर एमाले र माओवादीले आ–आफ्नो दाबी गरेका छन् । एमालेबाट दलका नेता खगराज अधिकारी र माओवादीबाट हरिबहादुर चुमान मुख्यमन्त्रीको दाबेदार देखिएका छन् ।