स्याङ्जा २५ पुस । भर्खरको कलकलाउदो उमेर छ। लाउँलाउँ र खाउँ खाउँ भन्ने उमेरमा मानसिक सन्तुलन गुमेको छ। आर्थिक अवस्था कमजोर भएका कारण राम्रो उपचार गर्न नसकिएको पारिवारिक स्रोतले जनाएको छ ।
भर्खर २३ बर्षे लागेकी सोममाया राना बिगत ३ बर्षदेखि मानसिक असन्तुलित रहेको उहाका बहिनी माया राना भन्नुहुन्छ । चारबर्ष अघि आफुले मन पराएको केटासंगै दिदीको बिहे भएको र त्यसपछि क्रमशः उहामा फरकपना देखिन थालेको रानाले बताउनुभयो । उहाहरुका एक छोरी छन् ।
उहाले भन्नुभयो, ‘सुरुमा भेनाले पनि उपचार गर्नुभयो। पछि छोरी सहित दिदीलाई पनि माइतै ल्याएर छाड्नु भो। एक÷डेढ बर्षदेखि दिदी माइतमै हुनुहुन्छ। अहिले भेना सम्पर्कमा आउनुहुन्न। ’
स्याङ्जाको बिरुवा गाउँपालिकाको चिन्नेबासमा जन्मनु भएका सोममाया रानाले छिमेकी जिल्ला तनहुँमा विहे गर्नु भएको हो ।
तीन दिदीबहिनी मात्र रहेको परिवारमा माइतर्फका बाबा ८० का बृद्ध छन। आमा अपांग हुनुहुन्छ । उहाको बोली नबुझिने बताइएको छ । परिवारको आर्थिक अवस्था निकै दयनिय रहेकाले उपचारमा समेत कठिनाई भएको समाजसेवी एवं छिमेकी मोहन थापाले जानकारी दिनुभयो ।
सोममाया जेठी छोरी । कान्छि बहिनीले अघिल्लो बर्ष आत्महत्या गरेकी थिईन । माइली बहिनी माया राना आफन्तको घरमा बसेर अध्ययन गरिरहनु भएको छ । पारिवारिक अवस्था निकै दयनिय छ ।
सोममायाका उपचारका लागि खर्चिने रकम परिवारसंग छैंन। बिहान र साँझको हातमुख जोड्न पनि समस्या रहेको सो परिवारले सुबिधा सम्पन्न अस्पतालमा लगेर उपचार गराउन सक्ने क्षमता पनि देखिद्यैन । गाउँघरमा गरिएका स साना उपचारले उनलाई निको हुदैन। सबैले सहयोग गरेमा उहाको अवस्था पहिलाको जस्तै फर्केर आउन सक्ने भन्नुहुन्छ विरुवा गाउँपालिकाका समाजसेवी डोलराज पोखरेल।
मानसिक सन्तुलन गुमेकै कारण दक्षिण पश्चिम विरुवाका सोममाया रानालाई मंगलबार (हिजो) प्रहरीले उत्तरतर्फको आँधीखोला गाउँपालिकाको पनि उत्तरी भेग सेपतमा भेटिएको सूचना सार्वजनिक गरेको थियो।