स्याङ्जा २७ असोज । प्रहरी दिवसको अवसरमा पारेर शुभकामना आदानप्रदान सहित सवारी दुर्घटना न्यूनिरकण सम्बन्धी कार्यक्रम गरिएका छन् ।
पुतलीबजार नगरपालिका १ स्थित बिष्णुपधेरामा आयोजित कार्यक्रमको उदघाटन गर्दै सहायक प्रमुख जिल्ला अधिकारी दिपक पौडेलले सवारी दुर्घटना न्यूनिकरणको जिम्मेवारी सुरक्षाकर्मी तथा ट्राफिकको मात्र नभई तपाई हामी सबैको जिम्मेवारी रहेको बताउनुभयो । दुर्घटना हुन सक्ने बिभिन्न माध्यमको पहिचान गर्दै त्यसतर्फ हामी सबैजना सचेत र सजग बन्नु पर्ने उहाको भनाई छ ।
कार्यक्रममा वडा अध्यक्ष उत्तमप्रसाद श्रेष्ठ, नागरिक समाजका अध्यक्ष ओमप्रकाश शर्मा, गण्डकी यातायात बस ब्यवसायी समितिका ब्यवस्थापक गणेश थापा लगायतले ट्राफिक नियमको पालना गरेमा दुर्घटनाबाट बच्न र बचाउन सकिनेमा जोड दिनुभयो ।
प्रहरी नायब उपरीक्षक रविन्द्र खनालको अध्यक्षतामा सम्पन्न कार्यक्रमको संचालन प्रहरी वरिष्ठ निरीक्षक प्रविण आचार्यले गर्नुभएको थियो । यसैगरी, सोही अवसरमा यात्रु सहायता कक्षको समेत उदघाटन गरिएको छ ।
जिल्लाभर ४ वटा पालिकाहरु फेदिखोला, पुतलीबजार, वालिङ र गल्याङमा यात्रु सहायता कक्षको उदघाटन गरिएका ट्राफिक प्रमुख समेत रहनुभएका आचार्यले जानकारी दिनुभयो ।