शिक्षक बिद्यार्थीलाई ईन्टरनेट प्याकेजसहित निशुल्क सीमकार्ड

स्याङजा, १३ साउन । वालिङ नगरपालिकाले यहाँ कार्यरत शिक्षक तथा विद्यार्थीलाई निशुल्क सीमकार्ड उपलब्ध गराएको छ ।
नगरपालिका अन्र्तगत सामुदायिक विद्यालयका शिक्षक र विद्यार्थीगरी ७ हजार ५ सय जनालाई एक महिने ईन्टरनेट प्याकेज सहितको सीमकार्ड उपलब्ध गराएको हो। उनीहरुलाई नेपाल टेलिकम तथा एनसेलका सीमकार्ड दिइएको छ ।
छपन्न वटा आधारभूत र १६ माध्यमिकगरी ७२ वटा बिद्यालय रहेको वालिङका ५ हजार नेपाल टेलिकमका र २ हजार ५ सय वटा एनसेलका सीमकार्ड बितरण गरीएको हो ।
बढ्दो कोभिड संक्रमणका कारण घरमै बसेर पठनपाठन गर्नु गराउनु परेकाले शिक्षक तथा बिद्यार्थीलाई सीम सहितको इन्टरनेट आवश्यकता महसुसगरी उपलब्ध गराइएको पालिकाले जनाएको छ।
संक्रमणका कारण विद्यालयमा भौतिकउपस्थितीमा अध्ययन अध्यापन गर्न गराउन नपाइएको बेला उनीहरुका अध्ययनलाई निरन्तरता दिन ईन्टरनेट सहितको सीमकार्ड उपलब्ध गराइएको नगरप्रमुख दिलिपप्रताप खाँणले जानकारी दिनुभयो ।
नगरपालिकाले पनि यहाँका प्रधानाध्यापक तथा कम्प्युटर शिक्षकहरुलाई आईसिटीमा अनलाईन सम्बन्धी ज्ञान पनि दिएको छ। यहाँका १६ वटै माध्यमिक विद्यालयहरुमा कम्युटर, ल्यापटप, स्क्यानर, प्रिन्टर सहित ईन्टरनेट सेवा विस्तार भैसकेको प्रमुख खाँणको भनाई छ।
आधारभूत तहतर्फ पहिलो चरणमा २४ वटा विद्यालयलाई कम्युटर र प्रिन्टर उपलब्ध गराएको छ । बाँकी रहेका ३२ वटा विद्यालयलाई यही साउन महिनाभित्रै टेण्डर गरी उपलब्ध गराउने तयारी भएको प्रशासकीय अधिकृत राजन भट्टराईले जानकारी दिनुभयो ।
पालिकाले बालविकास कक्षादेखि १० सम्मका ७ हजार ५ सय विद्यार्थीलाई उपयोगी हुने सिकाई सहजीकरण स्वअध्ययन सामग्री पनि उपलब्ध गराईसकेको शिक्षा शाखा प्रमुख बाबुराम सापकोटा भन्नुहुन्छ ्।
नेपाल टेलिकम र एनसेल प्रालिका सीमकार्ड सहित एक महिनासम्म ईन्टरनेटको सुबिधा दिइएको हो। महिनापछि भने शिक्षक र विद्यार्थी आँफैले रिचार्ज गर्नुपर्नेछ। नगरका सबै ठाउँमा नेपाल टेलिकमका सेवा पहुँच सहज नभएकाले एनसेल सीमकार्ड पनि लिर्नैपर्ने आवश्यक छ ।