स्याङ्जा २५ असोज । नवौं राष्ट्रिय खेलकुद प्रतियोगितालाई लक्षित गर्दै निर्माण गरिएको वालिङ्को खेलमैदान निर्माण कार्य अन्तिम चरणमा पुगेको छ। प्रतियोगिताका दिन नजिकिदै गर्दा निर्माण कार्यलाई तिव्र पारिएको छ।
गण्डकी प्रदेशको पोखरामा हुने प्रतियोगिता अन्तर्गत राष्ट्रिय महिला फुटबल प्रतियोगिता भने वालिङमा गरिने भएको हो। असोज २८ गतेदेखि कात्तिक ३ गतेसम्म पोखरामा प्रतियोगिता हुनेभएको छ।
खेलमैदान सम्याएर दुवो विछ्याउने काम अन्तिम चरणमा पुगेको छ। आज (मंगलबार) साँझसम्ममा बिछ्याउने काम पुरा हुने पनि नगरप्रमुख कृष्ण खाँणले जानकारी दिनुभयो। दैनिक सयदेखि २ सयजनाले श्रमदान गर्दै निर्माणकार्यमा जुटेका छन्।
खेलमैदान चक्लाउनेदेखि दुवो छ्यिाउनेसम्मका काममा प्रमुख खाँण सहित, जनप्रतिनिधी, स्थानीयबासी, खेलाडी, खेलप्रेमी युवायुवती, सशस्त्र, प्रहरी लगायतको टोली सहभागी भएको उहाले बताउनुभयो ।
उहाले भन्नुभयो, ‘सिमित सार्वजनिक खेलमैदान थियो। त्यहाँबाट मात्र खेलाउन सम्भव थिएन। खेलमैदान बिस्तारका लागि बिद्यालय र निजी जग्गाधनीको समेत सहयोग छ।’ पोखरा र नारायणघाटबाट दुवो ल्याइएको हो। दुबोका लागि मात्र ४५ लाख खर्च भएको छ। एकसय ११०×७० स्क्वायर मीटर दुबो बिछ्याइदै छ। मैदानको पूर्ण तयारी गर्दा झण्डै १ करोड लाग्ने प्रमुख खाँणले बताउनुभयो ।
राष्ट्रिय खेलकुद परिषदले १० लाख उपलब्ध गराउने भएको छ भने बाँकी रकम वालिङ् नगरपालिकाले नै ब्यहोर्नुपर्ने भएको छ। यसका लागि जिल्ला स्थित गाउँपालिकाले २÷२ लाख र नगरपालिकाले ३÷३ लाख सहयोग गर्ने भएका छन्। यहाँ ५ नगरपालिका सहित ६ गाउँपालिका छन्।
खेलमैदानको स्तरोन्नतिसँगै राष्ट्रियस्तरको फुटवल प्रतियोगिता सञ्चालन गर्ने अवसर वालिङलाई जुटेकोमा स्याङ्जाबासी सहित खेलाडी, खेलप्रेमी लगायत सबैलाई उत्साही बनाएको छ।
खेलमैदान निर्माणसंगै धेरै खेलाडी उत्पादन गरेको स्याङ्जामा सुबिधासम्पन्न खेलमैदानको आवश्यकतालाई पुरा गरेको उपप्रमुख कविता तिवारीको भनाई छ ।
झण्डै ४ दशकपछि पोखरामा हुन लागेको राष्ट्रिय खेलकुद प्रतियोगितालाई स्याङ्जाबासीले समेत महत्वकासाथ हेरेका छन्।
