काठमाण्डौं २० पुस । राष्ट्रियसभा सदस्यको निर्वाचनका लागि सत्तारुढ दलहरुले सिट बाँडफाँड गरेका छन् ।
सोमबार बिहान प्रधानमन्त्री निवास बालुवाटारमा बसेको सत्तारुढ पाँच दलीय गठबन्धन बैठकले राष्ट्रियसभामा खालि रहेका १९ सिट बाँडफाँड गरी उम्मेदवारी दिने निर्णय गरेका हुन् ।
आगामी माघ १२ गते हुने राष्ट्रियसभा सदस्यको निर्वाचनका लागि ५ दलीय गठबन्धन बैठकले काँग्रेसलाई ६ सिट, नेकपा (माओवादी केन्द्र) र नेकपा (एकीकृत समाजवादी) लाई ५÷५ सिट, जनता समाजवादी पार्टी, नेपाललाई २ सिट र राष्ट्रिय जनमोर्चालाई १ सिट दिने निर्णय गरिएको काँग्रेस नेता समेत रहनु भएका सञ्चार तथा सूचना प्रविधिमन्त्री ज्ञानेन्द्रबहादुर कार्कीले जानकारी दिनु भयो ।
उहाँका अनुसार प्रदेश १ मा खालि रहेका ३ सिटमा महिलातर्फ एकीकृत समाजवादी, पुरुषतर्फ नेपाली काँग्रेस र अल्पसंख्यकको सिट जसपालाई दिइएको छ । त्यस्तै प्रदेश २ मा महिलातर्फ माओवादी केन्द्र र अन्यमा जसपालाई सिट दिइएको छ । वागमती प्रदेशमा अन्यमा नेपाली काँग्रेस, महिलामा नेकपा (एकीकृत समाजवादी) ले सिट पाएका छन् भने गण्डकी प्रदेशमा महिलामा काँग्रेस, अन्य तथा दलितका लागि माओवादी केन्द्रले सिट पाएको छ । त्यस्तै लुम्बिनी प्रदेशमा पुरुषतर्फ खुल्ला नेपाली काँग्रेस, महिलामा नेकपा (एकीकृत समाजवादी), दलितमा राष्ट्रिय जनमोर्चालाई सिट दिइएको छ । कर्णाली प्रदेशमा महिला नेपाली काँग्रेस, अपाङ्ग सिटमा माओवादी केन्द्र, खुल्लामा नेकपा (एकीकृत समाजवादी)लाई सिट दिइएको छ भने सुदूरपश्चिम प्रदेशमा खुल्लामा नेपाली काँग्रेस, दलितमा माओवादी केन्द्र, महिलामा नेकपा (एकीकृत समाजवादी)लाई सिट दिने निर्णय भएको पनि सञ्चारमन्त्री कार्कीले बताउनु भयो ।
मन्त्री, सञ्चार तथा सूचना प्रविधि मन्त्रालय मन्त्री कार्कीले विवेकपूर्ण र तर्कसम्मत हिसावले राष्ट्रियसभा सदस्यको निर्वाचनका लागि सिट बाँडफाँड गरेर उम्मेदवारी दिने निर्णय सत्तारुढ दलहरुले गरेको बताउनु भयो ।