काठमाण्डौ. १५ कात्तिक । प्रदेश १ का मुख्यमन्त्री भीम आचार्यले राजीनामा दिनु भएको छ । आज दिउँसो प्रदेशसभा बैठकमा राजीनामा घोषणा गर्नुभएका आचार्यले प्रदेश प्रमुख सोमनाथ अधिकारीलाई राजीनामा पत्र बुझाउनु भएको हो ।
मुख्य मन्त्रीले राजीनामा बुझाए लगत्तै प्रदेश १ का प्रदेश प्रमुख सोमनाथ अधिकारीले मुख्यमन्त्री भीम आचार्यको राजीनामा स्वीकृत गर्दै नयाँ सरकार गठनका लागि आह्वान गर्नु भएको छ । प्रदेश प्रमुख अधिकारीले नेपालको संविधानको धारा १६८ को उपधारा २ बमोजिम भोली दिउँसो १ बजेभित्र नयाँ सरकार गठनको दाबी पेश गर्न दलहरुलाई आह्वान गर्नुभएको छ ।
प्रदेशसभामा नेकपा एमाले सबैभन्दा ठूलो दल भएपनि एकल बहुमतको अवस्था नरहेकाले मुख्यमन्त्री पदबाट राजीनामा दिएको आचार्यले उल्लेख गर्नुभएको छ । गत भदौ १० गते आचार्य मुख्यमन्त्री नियुक्त हुनुभएको थियो ।
नियुक्त हुनुभएको १५ दिनमै उहाँ अल्पमतमा पर्नुभएको थियो । एमालेका १० सांसदले नेकपा एकीकृत समाजवादी रोजेसँगै अल्पमतमा पर्नुभएका आचार्यले संविधानअनुसार ३० दिनमा विश्वासको मत लिने प्रस्ताव पेश गर्नु भएको थियो । उहाँले राजीनामा दिएपछि प्रस्ताव मतदानमा नलगिएको हो ।