स्याङ्जा ६ फागुन । भीरकोट नगरपालिका ४ स्थित छायाँक्षेत्र मन्दिरमा महाशिवरात्रीको पुजाअर्जनामा धेरै भक्तालुजनहरुको उपस्थिती भएको छ। श्रीस्वथानी ब्रत कथामा समेत छाङछाङदीको महिमा उल्लेख गरिएकाले पनि यहाँ आउने भक्तजनहरु धेरै हुने गरेका हुन्।
गण्डकी प्रदेशकै प्रसिद्ध छाङछाङदी मन्दिरमा बिहान ३ बजेदेखि नै दर्शनार्थीका भीड लागेको मन्दिर व्यवस्थापन समितिका अध्यक्ष पिताम्बर श्रेष्ठले जानकारी दिनुभयो ।
जिल्लाकै नमूना मन्दिर र सबै प्रकृतिका मानिसका लागि प्रवेशमा सहज भएकाले यहाँ सधैजसो भीडभाड नै हुन्छ। साताअधिदेखि मन्दिर परिसर लगायत प्रवेशद्धारमा रंगरोगन, ध्यजापतकाले सजाइएको छ।
मन्दिरमा पुजाका लागि लाईन बसेर अथवा छिटो माध्यमबाट पनि जान सकिने ब्यवस्था मिलाइएको छ। आजका दिन झण्डै २० हजार भक्तजनले मन्दिरको दर्शन गर्ने मन्दिर व्यवस्थपन समितिका सचिव गोकुल अधिकारीले बताउनुभयो । सबैलाई सहज तरिकाले मन्दिर प्रवेश गराउनका लागि स्वयंसेबका खटाइएका छन्। सुरक्षाकर्मीको पनि बाक्लो उपस्थिती रहेको छ। ठाउँ ठाउँमा बसेका स्वयंसेवक र सुरक्षाकर्मीले भक्तजनलाई आउने जाने सहज हुनेगरी प्रवन्ध मिलाएका छन्।
भगवान शिवले पत्नी सतीदेवीको मृत शरिर लिएर ब्रमाण्ड घुम्ने क्रममा यहाँ आइपुग्दा बाँकी रहेका अंग खसेको स्वस्थानी कथामा उल्लेख छ। थकित शरिर लिएर यहाँपुग्दा तिर्खाएका शिवले भित्तामा त्रिशुलले हानेपछि छ्याङछयाङ गर्दै पानी बगेकाले यस स्थानलाई छ्याङछयाङदी नामाकरण गरिएको भन्ने भनाई छ।
अहिले पनि पहराबाट निरन्तर छाङछाङ गर्दै पानी छहरा बगिरहेको छ। यही छहराको पानीमा नुहाउने र सतीदेवीको मूर्तिलाई पुजाअर्चना गर्नका लागि देशभरका मानिसहरु यहाँ आउने गर्दछन।
भाकल गर्छन। भाकल पुरा भयो भन्दै पुनः पुजाका लागि आउने गरेका हुन्छ। गतबर्ष पनि महाशिवरात्रीका दिन झण्डै २० हजारले दर्शनपुजा गरेको मन्दिर ब्यवस्थापन समितिले जनाएको छ।
आज साँझ शिवधुनी लगायत भजनकिर्तन गरिने भएको छ।
