स्याङ्जा ९ फागुन । नजिकिदै गरेको स्थानीय तहको निर्वाचनमा मतदाता नामावलीमा नाम भएका मतदातालाई लक्षित गर्दै स्याङ्जा जिल्ला निर्वाचन कार्यालयले परिचयपत्र हराएकाले सम्पर्क राख्न अनुरोध गरेको छ ।
कार्यालयका अनुसार मतदाता परिचयपत्र हराएका ब्यक्तिले यही फागुन २० गते भित्र निवेदन दिन सक्ने व्यवस्था रहेको छ । जिल्ला निर्वाचन कार्यालय स्याङ्जामा आएर निवेदन दिन सक्ने कार्यालयले जनाएको छ ।
जिल्ला निर्वाचन अधिकृत गुरुप्रसाद मरासीनीका अनुसार परिचयपत्र हराएमा, च्यातिएमा वा नष्ट भएमा कार्यालय आएर निवेदन दिन सकिन्छ । कार्यालयमा आउँदा सम्बन्धित वडा कार्यालयको सिफारिस, नागरिकता, मतदाता परिचयपत्रमा उल्लेख भएको नम्बर ल्याउनुपर्नेछ ।
मतदाता परिचयपत्र नबुझिने गरी च्यातिएको भए सोही परिचयपत्र पनि ल्याउनुपर्ने कार्यालयले जनाएको छ । योसंगै जिल्लाका ५ नगरपालिका र ६ गाउँपालिकाका मतदातालाई जानकारीका लागि सूचना सार्वजनिक गरिएको उहाले जानकारी दिनुभयो ।
कार्यालयका अनुसार आर्थिक बर्ष सुरु भएसंगै यहा १८ हजार नयाँ मतदाता थपिएका छन । जिल्ला निर्वाचन कार्यालय र जिल्ला तथा इलाका प्रशासन कार्यालयमा भइरहेको मतदाता नामावली दर्ता कार्य स्थानीय तह निर्वाचन घोषणासँगै निर्वाचन आयोगको निर्देशन अनुसार हाल स्थगित छ ।
मतदानको अघिल्लो दिन अर्थात बैशाख २९ गतेसम्म १८ वर्ष उमेर पूरा भएकाले किशोर किशोरीले मतदान गर्न सकिने नयाँ व्यवस्था छ । यसअघि भने निर्वाचन घोषणाका दिन १८ बर्ष पुरा भएको हुनु पर्ने प्रावधान थियो ।