स्याङजा १४ भदौ । हरितालिका तीजको अबसर पारेर पुतलीबजार नगरपालिकाले नगरस्तरीय तीज गीत प्रतियोगिता गरेको छ ।
प्रतियोगिताको उदघाटन गर्दै संघिय सांसद राजु थापाले महिला मैत्री कानून निर्माण गर्ने बताउनुभयो । उहाले बढ्दो हिंसा न्यूनिकरण सहित अन्त्यका लागि कानून संशोधनका लागि आवाज उठाउने बताउनुभयो । महिला हिंसामा पुरुषहरु बढी संलग्न भए पनि महिलाबाट महिला नै प्रताडित बन्न दिन नहुनेमा उहाले जोड दिनुभयो ।
धर्म र कुप्रथाका नाउमा बोक्सी लगायतका आरोप लगाउदै शारिरीक र मानसिक यातना बन्द गर्नै कार्यमा महिला महिलाबीच एकता र सहकार्य हुन आवश्यक रहेको बताउनुभयो । संबिधानले महिलालाई बिभेद नगरेको जनाउदै उच्च पदस्थ स्थानमा महिलाले कुशलतापूर्व आ आफना जिम्मेवारी कुशलतापूर्वक बहन गरेको जनाउनुभयो ।
‘हिजो जस्तो आज छैन । समय धेरै परिवर्तन भैसकेको छ । राजनीतिक परिवर्तनसंगै नवनिर्मित संबिधानमा महिलामैत्री छ । राज्यका हरेका तहमा महिलाको सहभागिता छ । अन्य राष्ट्रको तुलनामा महिला अधिकारका क्षेत्रमा नेपालको संबिधान उत्कृष्ठ ठहरिएको छ ।’ उहाले थप्नुभयो, ‘आजका महिला सचेत छन । शिक्षित छन । तर पनि हिंसाका घटनामा कमी देखिएको छैन । हत्या, हिंसाका घटना बढेका छन । यस्ता घटना न्यूनीकरणका लागि महिला दिदीबहीनी एकजुट भइृ लाग्नु पर्नेछ । महिलालाई शिक्षा सहित आत्मरक्षाका तालिम उपलब्ध गराउन आवश्यक छ ।’
नजिकिदै गरेको हरितालिका तीजको शुभकामना ब्यक्त गर्दै नेपाली परिवेश र क्षमता सुहाउदो रुपमा मनाई हाम्रा कला, संस्कृति र परम्परालाई जोगाई राख्न समेत सुझाव दिनुभयो ।
कार्यक्रममा जिल्ला समन्वय समिति प्रमुख श्रीप्रसाद घर्ति लगायतले हरितालिका तीजको शुभकामना ब्यक्त गर्नुभएको थियो ।
नगर उपप्रमुख देवी अर्यालको अध्यक्षतामा सम्पन्न कार्यक्रममा कार्यपालिका सदस्य संजीता अर्यालले स्वागत एवं शिक्षा शाखाका नायब सुब्बा शोभा बस्यालले संचालन गर्नु भएको थियो ।
तीज गीत प्रतियोगितामा दुर्गानगर आमा समूह प्रथम, महिला संजाल वडा नं. १ द्धितिय, एकता बुहारी समूह तृतीय र अन्नपूर्ण आमा समूह सान्त्वना भएका छन । विजयी प्रतियोगीलाई संघीय सांसद राजु थापा र उपप्रमुख देवी अर्यालले नगद प्रमाणपत्र प्रदान गर्नुभएको थियो । प्रतियोगितामा नगरपालिकाका २९ वटा समूह सहभागी थिए ।