स्याङ्जा २५ कात्तिक ःगल्याङ नगरपालिकामा ३ सय जना अटाउने क्षमताको सिटी हल निर्माण गरिएको छ । वडा नम्बर ३ गल्याङबजार नजिकै सिटी हल निर्माण गरिएको हो । तीन करोड ६६ लाख ३५ हजार तीन सय ४३ रुपैयाँ ७९ पैसामा निर्मित सिटी हल सहित भवन बिहीवार हस्तान्तरण गरिएको छ ।
निर्माण आयोजनाका तर्फबाट सहरी विकास संघीय आयोजना कार्यान्वयन इकाई कास्कीले गल्याङ नगरपालिकालाई सिटी हल भवन हस्तान्तरण गरेको हो । कार्यक्रममा आयोजनाका प्रमुख इन्जिनियर झपटबहादुर थापाले गल्याङ नगरपालिका प्रमुख भुपराज अधिकारीलाई भवन हस्तान्तरण गर्नुभयो । कार्यक्रममा गल्याङ नगरपालिका प्रमुख भुपराज अधिकारीले समयमा नै सिटी हल निर्माण गरी हस्तान्तरण गरिएको भन्दै धन्यवाद ज्ञापन गर्नुभयो । उहाँले विकासको सन्दर्भमा स्थायी सरकारको रुपमा रहेको कर्मचारी प्रशासनको महत्वपूर्ण हात हुने बताउनुभयो । कार्यक्रममा गल्याङ नगरपालिका प्रमुख प्रशासकीय अधिकृत दामोदर शर्माले विकास निर्माणको प्रक्रिया एकैपटक नहुने भन्दै क्रमशः विकासको कामहरु अगाडि बढ्दै गएको बताउनुभयो ।
सहरी विकास संघीय आयोजना कार्यान्वयन इकाई कास्कीका आयोजना प्रमुख झपट बहादुर थापाले समयमा नै सिटी हल हस्तान्तरण गर्न पाउदा आफुलाई खुशी लागेको बताउनुभयो ।
कार्यक्रममा गल्याङ नगरपालिका युवा, खेलकुद तथा शिक्षा शाखा प्रमुख केदारराज आचार्य, लेखा शाखा प्रमुख भोजराज बगाले, प्राविधिक शाखा प्रमुख इन्जिनियर प्रज्वल गिरी, आयोजनाका इन्जिनियर रामकृष्ण गिरी, सब इन्जिनियर सागर पोखरेल, प्रविण क्षेत्री, निर्माण व्यवसायी रविना फुलजोर जेभीका सञ्चालक नोठप्रसाद खनाल, टेकनाथ अधिकारी लगायतको सहभागिता रहेको थियो ।