स्याङ्जा ३१ भदौ । गल्याङ नगरपालिकामा लक्षीत समुह मध्ये ४० प्रतिशत लगाइएको स्वास्थ्य शाखाले जनाएको छ । नगरपालिकाको स्वास्थ्य शाखाले गरेको वार्षिक समीक्षा कार्यक्रममा यो जानकारी दिइएको हो ।
समिक्षा कार्यक्रममा दिइएको जानकारी अनुसार पहिलो खोपको मात्रा नौ हजार चार सय ३७ जनालाई लगाइएको छ भने आठ हजार नौ सय ६२ जनालाई पूर्ण खोप लगाइएको छ । नगरपालिकाको स्वास्थ्य शाखाले गत आर्थिक वर्षमा गरेको कामको समीक्षा गरिएको हो । कार्यक्रममा नगर प्रमुख भुपराज अधिकारीले जनताको स्वास्थ्यमा कुनै किसिमको खेलवाड नगर्न आग्रह गर्नुभयो । उहाँले स्वास्थ्य नै मानव जीवनको सबैभन्दा ठूलो कुरा भएको भन्दै स्वास्थ्य सेवालाई गुणस्तरीय बनाउनुपर्नेमा जोड दिनुभयो । उहाँले प्रदेश तथा केन्द्रका योजनाहरुलाई प्रभावकारी कार्यान्वयन गर्न र अधिकतम सेवामा लाग्न पनि कर्मचारीहरुलाई आग्रह गर्नुभयो । स्थानीय सरकारबाट थप बजेट विनियोजन गरेर भए पनि स्वास्थ्य क्षेत्रमा सुधार गर्न आफु प्रतिबद्व रहेको उहाँले बताउनुभयो ।
कार्यक्रममा गल्याङ नगरपालिकाका प्रमुख प्रशासकीय अधिकृत दामोदर शर्मा, युवा तथा शिक्षा शाखा प्रमुख केदारराज आचार्य, स्वास्थ्य शाखा प्रमुख गुनेन्द्र राना, सिनियर अहेब विपिन कोइराला लगायतले नगरपालिका भित्रका स्वास्थ्य संस्थासँग समन्वय गरी अधिकतम सेवा दिन लागि परेको बताउनुभयो । वार्षिक समिक्षामा कोरोना भाइरस (कोभिड १९) को दोश्रो भेरियण्टका कारण नगरपालिकामा ४३ जनाको निधन भएको जानकारी दिइएको छ । नगरपालिकामा ३१ जना पुरुष र १२ जना महिलाको निधन भएको छ । नगरपालिकामा सबैभन्दा धेरै वडा नम्बर ३ मा १३ जना र दोश्रोमा वडा नम्बर ११ मा १० जनाको कोरोना संक्रमणका कारण निधन हुनुभएको छ ।