कोरोना नियन्त्रण र पूर्वाधार विकास, विरुवाको प्राथमिकतामा

स्याङ्जा, १२ असार ।
विरुवा गाँउपालिकाको नवौं गाँउसभा सम्पन्न भएको छ । सभामा गाँउपालिकाले आगामी आर्थिक वर्ष २०७८ र०७९ का लागि गाँउपालिकाकी उपाध्यक्ष देवी थापाले ४२ करोड ९२ लाख ६८ हजार रुपैया बरावरको अनुमानित बजेट सार्वजानिक गर्नुभएको हो । आर्थिक विकास, सामाजिक विकास, भौतिक पुर्वाधार विकास, सुशासन तथा अन्तर्रसम्वन्धित क्षेत्र, विपद व्यवस्थापन, सामाजिक सुरक्षा र कार्यालय सञ्चालन समेतका क्षेत्रमा विभाजन गरी क्षेत्रगत नीति तथा कार्यक्रमका आधारमा क्षेत्रगत विनियोजनको व्यवस्था मिलाईएको उपाध्यक्ष थापाले जानकारी दिनुभयो ।

प्रस्तुत बजेटमा चालू तर्फ १४ करोड ९२ लाख ७२ हजार, पूँजीगत तर्फ ६ करोड ९९ लाख ९६ हजार र शसर्त तर्फ २१ करोड गरी कुल ४२ करोड ९२ लाख ६८ हजारको अनुमानित बजेट प्रस्तुत गरिएको छ । सभामा गाँउपालिकाका अध्यक्ष चुन प्रसाद शर्माका अनुसार आगामी वर्षको नीति तथा कार्यक्रममा मुख्य प्राथमिकतामा राखिएको कोरोना नियन्त्रण, सडक पूर्वाधार विकास, पर्यटन, कृषि, रोजगारी र शिक्षालाई बजेटमा प्राथमिकता दिएको छ । गाउँपालिकाले आर्थिक विकास, गरिबी निवारण, र रोजगारीको सिर्जना गर्ने उद्धेश्य लिएको अध्यक्ष शर्माले जानकारी दिनुभयो ।उत्पादनमुलक तथा छिटो प्रतिफल पाइने, जनताको जीवनस्तर उकास्ने, स्थानीय श्रोत साधन, सिप र स्थानीयको सभागितामुलक कार्यक्रमलाई जोड दिईएको छ । दिगो विकास वातावरणीय संरक्षण तथा सम्वर्दन, पारदर्शि, उत्तरदायित्व र सूचनाको हक मार्फत सुसशासनको अभिबृद्धि गर्ने कार्यक्रम नीति तथा कार्यक्रममा समावेश गरिएको उहाले बताउनुभयो ।
सभामा वडा नम्वर ६ का अध्यक्ष कृष्ण केसी, प्रकाश थापा, युवराज केसी लगायतले सुझाव एवं टिकाटिप्पणी गर्नुभएको थियो । सभाले बन ऐन २०७८ पारित गरेको छ ।