स्याङ्जा १५ जेठ । आज जेठ १५ गते १६ औं गणतन्त्र दिवस स्याङ्जा लगायत मुलुकभर बिबिध कार्यक्रमगरी मनाइँदै छ ।
सरकारले गणतन्त्र दिवसलाई बढीभन्दा बढी नागरिकको सहभागितामा भव्यताका साथ ३ दिन मनाउने भएको छ । विक्रम संवत् २०६५ साल जेठ १५ गते ऐतिहासिक संविधानसभाको पहिलो बैठकले एक शताब्दी लामो राजतन्त्रको अन्त्य गरी नेपाललाई सङ्घीय गणतान्त्रिक मुलुक घोषणा गरिएको थियो ।
जनआन्दोलन २०६२ र ०६३ को जगमा गणतन्त्र घोषणा भएको ऐतिहासिक दिनको स्मरण गर्दै हरेक वर्ष ज्येष्ठ १५ गते देशभर विभिन्न कार्यक्रम गरी यो मनाइदैछ । १० वर्षे सशस्त्र जनयुद्ध र १९ दिने जनआन्दोलनको बलमा स्थापित जहानियाँ राजतन्त्र अन्त्य भएर मुलुक गणतन्त्रमय बनेको थियो ।
ऐतिहासिक दिनको सम्मान स्वरूप हरेक वर्षको ज्येष्ठ १५ गते नेपालले आफ्नो गणतन्त्र दिवस मनाउँदछ । ज्येष्ठ १५ गतेको यसै ऐतिहासिक दिनको सम्मान स्वरूप सरकारले आज सार्वजनिक बिदा दिएर यसलाई सम्मान, गौरव र लोकतान्त्रिक गणतान्त्रिक मुलुकको उपलब्धिलाई उत्सवको रूपमा सारा नेपालीले मनाउने गर्दछन् ।
यसैगरी, स्याङ्जाका सबै पालिकामा गणतन्त्र दिवस मनाइने भएको छ । पुतलीबजार नगरपालिकाले पनि आज बिहान ७. ३० बजे प्रभातफेरि लगायतका बिबिध कार्यक्रम गर्दै छ । हिजो पनि जिल्ला अस्पतालमा फलफूल बितरण र अन्तरपालिका स्तरीय हाजिरीजवाफ प्रतियोगिता पनि सम्पन्न भैसकेका छन् ।